AQŞta migrant balalarına antidepressant birü turında bäxäslär

AQŞta “Nol’ tolerantlıq” säyäsäte nigezendä Meksika çigendä ğailälärennän tartıp alınğan migrant balalarğa depressiyägä qarşı darular birelüen söylilär

1025520
AQŞta migrant balalarına antidepressant birü turında bäxäslär

AQŞta “Nol’ tolerantlıq” säyäsäte nigezendä Meksika çigendä ğailälärennän tartıp alınğan migrant balalarğa depressiyägä qarşı darular birelüen söylilär. Bu Kaliforniyädä açılğan ber däğ’wa näticäsendä bilgele buldı. Anda migrantlar üzägendä totılğan bik küp balalardan soraştıru ütkärälär häm alar üzlärenä mäcbüri räweştä ênä qadawların äytä. Änilär dä balalarda darunıñ tiskäre yoğıntısın  kürelülären söyli.

Mäxkämä balalarğa ğailälärennän röxsätsez psikotrop diyelgän anti-depressant birüne tıydı häm üzäktä totıluçı balalarnı başqa ber urınğa küçerergä qarar çığardı.

Şilox migrantlar märkäze isä bu ğayepläwlärne qabul itmäde. Ämma mäxkämä qararına qarşı da çıqmadı, anıñ döres buluın rasladı.

Amerikalı wäkillär möhacir ğailälär totıluçı üzäklärdä naçar möğamälä turındağı süzlärne dä kire qağa. Alar bu märkäzlärdäge wäzğıyät’neñ ulqadär ük tiskäre bulmawın söyli. Beräw älege ob’yektlarnı cäyge lager’ğa oxşattı häm ğailälärneñ anda köndä 3 tapqır aşatıluın, waqıtların äybät ütkärüen äytte. Tramp idaräse dä balalarnıñ yaxşı urında buluına ışandırırğa tırışa. Ämma migrantlarnıñ bu lager’larda räşätkä artında utıruın kürsätüçe fotolar inde mäğ’lümat çaralarında çıqqan ide.   

Trampnıñ “nol’ tolerantlıq” säyäsäte nigezendä AQŞ-Meksika çigendä meñnärçä bala ğailälärennän ayırılırğa mäcbür buldı. Rizasızlıq çaralarınnan soñ Tramp alarnı äti-änisenä birü öçen qarar imzaladı. Balalarnıñ ber öleşe uzğan atnalarda ğailäläre belän quşıldı. Şaqtıyı äle xaman äti-änisen kürä almıy.   



Bäyläneşle xäbärlär