İzraildä armiyädän kitälär

İzrail’dä däwlätkä tuğ’rı xezmät itüläre belän tanılğan häm armiyägä alınuçı siräk xalıqlardan bulğan druzlar “Yähüd milli däwlät qanunı”na rizasızlıq belderep ğaskärdän kitä başladı. Kapitan Amir Jmall yäkşämbe könne Feysbukta xökümät räise Ben’yamin Netan’yaxuğa möräcäğat’ itep xat yazdı häm xärbi xezmätne taşlawın belderde. Ul bu adımğa “Yähüd milli däwlät qanunı”na rizasızlıq yözennän baruın da äytä. “Min irtän tordım, ştabqa baru öçen yulğa çığarğa xäzerländem häm üz-üzemä soraw birdem: İzrail däwlätenä nigä xezmät itäm? Ätiyem, ike ir tuğanım häm min üzebezne bu ilgä bağışlap, burıçıbıznı ütäw häm watannı yaratu xise belän xezmät ittek häm näticädä närsägä iyä buldıq? İkençe däräcä watandaşlıqqa,”-dip yaza Amir Jmall. Aña başqa druz komandirları da quşıldı. Alar da “Yähüd milli däwlät qanunı”na rizasızlıq belderä. Bu reakśiyälärdän soñ İzrail ğomumştab başlığı Gadi Êisenkot xärbilärneñ bäxäsle säyäsi mäs’älälärne armiyägä kitermäskä tiyeşlegen assızıqladı.  

İzrail däwläten barlıq dön’yadağı yähüdlärneñ êtnik-dini watanı bularaq bilgelägän “Yähüd milli däwlät qanunı” uzğan ay parlamentta qabul itelde.