Al’plarda 64 yıl êlek yuğalğan çañğıçını taptılar

İtal’yan poliśiyäse sośial’ çeltärneñ köçe yärdämendä 64 yıl êlek Al’plarda yuğalğan ber çañğıçınıñ şäxesen açıqladı.

13 yıl êlek Şveyśariya-İtaliya çige tiräsendäge tawlarda 3 meñ metr biyeklektä ber keşeneñ qaldıqların häm çañğı şuu kiräk-yaraqların taptılar. Anıñ şuğan waqıtta qazağa oçrap ülüen farazladılar. Ämma kemlegen ul waqıtta açıqlaw mömkin bulmadı.

DNK texnologiyälärendäge alğa kiteş uzğan yıl Turindağı sud-mediśina belgeçläreneñ qayber kriteriylarnı bilgeläwenä yärdäm itte. Anda açıqlanğança, cäsäd qaldıqları 30 yäş’lärendäge 1,65 metr buylı ir-atnıqı. Anıñ yaz köne ülüen dä açıqlıy aldılar. Cäsäd belän bergä 1946-1950nçe yıllar arasında çıqqan timer aqça da tabıla. Şuña kürä, bu keşeneñ 1950nçe yıllarda yuğaluın farazlıylar.    

Uzğan ayda poliśiyä bu mäğ’lümatlarnı sośial’ mediyada urtaqlaşıp, serne çişü öçen yärdäm soradı. Monnan tış, törle matbuğat çaraları bu waqıyğanı xäbärlärdä çığardı. Franśiyädä yäşäwçe Êmma Nasem isemle xanım da bu xäbärlärne işetä. Ul cäsäd qaldıqlarınıñ ozın yıllardır xäbärsez yuğalğan sanaluçı Genri Le Masne - ätiseneñ bertuğanı bulırğa mömkinlegen äytä. Ul 1954nçe yılda Al’plarda köçle buran waqıtında yuqqa çıqqan. Nasemnıñ 95 yäşendäge ätisennän alınğan DNK ürnäkläre dä cäsäd qaldıqlarınıñ Le Masneneke buluın rasladı. Ul üzenä 35 yäş’ tulğan könne 1954nçe yılnıñ 26nçı martında ülgän.