Monnan 30-40 meñ yıl yäşägän sualçannar terelde

Seberdä meñnärçä yıllıq tuñ tufraq ürnäkläre êregännän soñ anıñ êçendäge 2 sualçan canlandı, tormış bilgeläre kürsätte häm tuqlana başladı.

Rusiyä başqalası Mäskäwdä Tufraq belemeneñ fizik-ximik häm biologik mäs’äläläre institutı laboratoriyäsendä, Seberdän kiterelgän bik borıñğı çorlarğa qarawçı tufraq ürnäklären tikşergän waqıtta, bozlanıp qatqan 300läp sualçannıñ ikese yañadan canlandı. Alarnıñ berse yaqınça 32 meñ, ikençese isä 42 meñ yıl tiräse tuñ xäldä bulğan dip uylanıla.

Bozlıq çorına qarawçı bu canlılarnıñ adaptaśiyä mexanizmı kriobiologiya häm astrobiologiya şikelle fännär öçen ähämiyätle. Sualçannarnı tormışqa qaytarğan mexanizmnı tikşerü Cir tışında yäşäw barlığına bäyle teoriyälärneñ kübesen üzgärtergä mömkin. Global’ cılınu däwam itep tufraq êri başlasa oxşaş canlılarnıñ yañadan tormışqa äylänep qaytuı ixtimal.