Mäğarädäge balalar äle xaman çığa almadı

Tailandta ber mäğarä êçendä yuğalğan 12 yäş’ futbolçı häm trenerların äle xaman çığara almıylar. Alarnıñ sawlıqları äybät buluın xäbär itälär. İsegezgä töşeräbez, balalar mäğarägä kergännän soñ cir ubılıp çığu yulın qapladı. Monnan tış, köçle yawımnar näticäsendä taw quışı su belän kümelde. Futbol komandasın êzläw xalıqara operaśiyägä äylände. Tailand armiyäseneñ akvalangçılarına yärdämgä AQŞ, Angliya, Avstraliya häm Qıtaydan belgeçlär kilde. Barlıq êşlär su astında başqarıldı, çönki mäğarägä başqaça kerü mömkin tügel ide.

Tabılğan balalarnı älegä mäğarädän alıp çığa almadılar. Räsmi xäbärlärgä qarağanda, alar yanında, arasında tabib häm şäfqat’ tutaşı da bulğan, 7 keşelek törkem bar. Balalarğa tiz señdereşle yuğarı ênergiyäle rizıqlar häm minerallar birelä. Xäzerge waqıtta 12 futbolçı häm trenerların tışqa çığaru yulların barlıylar. Alarğa dayving därese birep su astınnan yözderep çığarırğa da uylıylar. Qotqaruçılar başta balalarnıñ köç cıyuın teli. Soñınnan alarnı imin ısul belän çığaru küzdä totıla.    

11 häm 16 yäş’ arasındağı 12 bala häm 25 yäş’lek trenerları 23nçe iyün’dä mäğarä sistemalarındağı säyäxätläre waqıtında yuğaldı. Alarnı 9 könnän soñ taptılar.