İranda susızlıq

İrannıñ Xuzistan töbägendäge Xürrämşähär qalasında krannan aqqan sunıñ pıçraq buluınä häm sunıñ yış qına kilmäwenä rizasızlıq belderep uramğa çığuçılarğa qarşı poliśiya ut açtı. Näticädä 4 keşeneñ ğomere özelüen belderälär. Bu xaqta İrannıñ räsmi xäbär agentlığı İRNA da yazdı. Sośial’ çeltärdä poliśiyäneñ rizasızlıq kürsätüçelärgä qarşı küz yäşe çığaruçı gaz qullanuı, ut açuı häm qayberäwlärneñ yaralanuın dälilläwçe videolar çıqtı.

İran êçke êşlär ministrı Abdurriza Raxmani Fazli protest çaralarında ülüçelär buluın kire qaqtı. Ul barı tik 1 keşeneñ yaralanuın belderde. Ministr älege waqıyğalarnı “qotırtu” bularaq bäyäli. Räsmi zat äytüençä, Xürrämşähär häm Abadan qalalarında 1992nçe yılda başlanğan Çatır proyıktı 6nçı iyül’ könne tormışqa aşırılaçaq. Şunıñ belän töbäktä çista su mäs’äläseneñ xäl iteläçägen ışandıralar.  

Xuzistan töbägendäge Ramxürmüz häm Äl-Fars rayonnarında 230 keşe ağulanıp xastaxanägä möräcäğat’ itte. Belgeçlär bu ağulanunıñ säbäben pıçraq sudan kürä. Xäzer mäs’äläne xoquq saqçıları tikşerä.

İranda bıyıl yawım-töşem az. Qorılıq näticäsendä su çığanaqları kimi. Bu ildä êçä torğan su krizisına kiterde. Krannardan pıçraq häm tozlı su ağuına şiqayät’ itüçe xalıq tankerlardan su satıp alırğa mäcbür.