AQŞta “säyäxät tıyuı” uñaylandı

AQŞnıñ Yuğarı mäxkämäse ilbaşı Donal’d Trampnıñ qayber möselman däwlätlärneñ watandaşlarına ilga kerüne kirtälägän “säyäxät tıyuı”n uñayladı. Bu qararnı Tramp idaräse 1 yıl êlek çığarğan ide. Ämma keçe mäxkämälär häm ştat prokurorları anı kire qağıp kilde. Yuğarı mäxkämä isä qararnıñ töp qanunğa qarşı kilmäwen açıqladı.

Qararğa kürä 7 däwlätneñ watandaşları 90 kön buyınça AQŞqa kerä almayaçaq.  

“Säyäxät tıyuı” xalqınıñ kübese möselman bulğan İran, Liviya, Somali, Süriyä, Yämängä, şulay uq, Tön’yaq Koreya keşeläre häm Venesuêlanıñ qayber däwlät xezmätkärlärenä qağıla.

Belderüdän soñ yuğarı mäxkämä qarşında cıyılğan yözlärçä keşe qararğa rizasızlıq belderde. Bolar möselmannar ğına tügel ide. Xristiannar da teläktäşlek kürsätte.

Amerikanıñ grajdannar irege berlege qararnı rasaçılıq häm ksenofobiyägä yul açuçı yalğış adım bularaq bäyäläde.  

Demokratlar partiyäse anıñ qabat qaraluın teläde. Cömhüriyätçelär isä qararnıñ terrorçılıqqa çik quyaçağına ışana.

 “Säyäxät tıyuı” Trampnıñ ant birep wazıyfasına kereşüennän soñ täwge imzalağan qararnamälärennän berse.