AQŞ BMOnıñ Keşe xoquqları şurasınnan çıqtı
AQŞnıñ oyışmadağı daimi wäkile Nikki Xeyli ilenen älege adımğa baruınıñ säbäben: “Bu şura isemenä layıq tügel,”-dip añlattı
Amerika Quşma Ştatları BMOnıñ Keşe xoquqları şurasınnan çıqtı. AQŞnıñ oyışmadağı daimi wäkile Nikki Xeyli ilenen älege adımğa baruınıñ säbäben: “Bu şura isemenä layıq tügel,”-dip añlattı.
Xeyli häm AQŞ däwlät departamentı başlığı Mayk Pompeo urtaq matbuğat kiñäşmäse oyıştırdı. Alar ber yıl êlek ilbaşı Donal’d Trampnıñ, BMO Keşe xoquqları şurası êçendä reforma ütkärelmäsä, AQŞnıñ annan çığaçağı xaqında belderüen xäterlätte. Xeyli äytkänçä, ul waqıttan birle oyışmada üzgäreş bulmağan.
Wäkil şura äğ’zası Qıtay, Kuba häm Venesuêla şikelle däwlätlärdä keşe xoquqların bozu oçraqları buluın söyläde. Monnan tış, ul oyışmanıñ İzrail’gä qarşı aldan uq yalğış fikerdä toruın assızıqladı.
Kiñäşmädä äytelgänçä, şura strukturasında üzgäreşlär yasalsa, AQŞ aña yañadan keräçäk ikan.
AQŞ däwlät departamentı citäkçese Pompeo isä şuranıñ keşe xoquqların yaqlawda “citärle” bulmawın alğa sörde. Ul oyışmanıñ başka illärdäge xoquq bozularğa küz yomıp, İzrail’ne tänqıyt’läweneñ ikeyözlelek buluın söyli.
BMO ğomum särqatibe süzçese Stefan Duyarriç ta, AQŞnıñ Keşe xoquqları şurasınnan çığu xäbärennän soñ, yazma belderü yasadı. “Ğomum särqatib Antonio Guterriş AQŞnıñ Keşe xoquqları şurasında qaluı yağında. BMO - Keşe xoquqları arxitektorı, böten dön’yada keşe xaqlarına teräk bulu häm saqlawda bik ähämiyätle rol’ uynıy,”-diyelä belderüdä.
BMO Keşe xoquqları şurasınıñ 2nçe iyül’dä cıyılıp Fälästin-İzrail’ mäs’äläsen tikşerüe kötelä.
Şuranıñ märkäze Jenevada. Oyışmanıñ äğ’zası bulıp 47 il tora. Törkiyä anda küzätüçe däwlät statusında.
