Musson yañğırları arakanlı möselmannarğa zarar birde

Bangladeşta yılnıñ täwge muson yañğırları cirlärennän quılğan arakanlı möselmannarğa zarar birde. Alar yäşi torğan lager’larda 37 cir ubılu buldı. 11 keşe yawımnardan täêsirlände.  

BMO qaçaqlar êşe buyınça yuğarı komissariatı süzçese Andrey Maxeçiç beldergänçä, sıyınuçılarnıñ lager’ları urnaşqan Koks Bazarda tizlege säğatenä 70 kilometrğa citüçe köçle cil häm yañğırlar kimendä 89 küñelsez oçraqqa säbäpçe buldı.

İyün’nän sentyabr’gä qadär däwam itüçe musson çorınıñ berençe yañğırları ber balanıñ ülemenä häm qayber keşelärneñ yaralanuına kiterde. Lager’ urnaşqan cirlärdäge yawımnar BMO häm başqa gumanitar yärdäm oyışmaları öçen täwge sınaw buldı. Maxeçiç lager’lardağı 2500 ğailädän yaqınça 11 meñ keşeneñ yañğırlardan zıyan kürüen belderde.  Töbäktä barlığı 900 meñ arakanlı möselman yäşi.

Bangladeş Meteorologiya idaräsenä kürä, Koks Bazar töbägenä yaqınça 400 millimetr yañğır yawğan. Ul meñnän artıq sıyınu urınına, 10 su taratu noqtasına, 167 bädräf, ber sälamätlek saqlaw ob’yektı häm rizıq taratu mäydanına zarar birgän.