Tramp Aq Yortta täwge tapkır iftar aşı ütkärde
Anda qayber möselman däwlätläreneñ Vaşingtondağı çit il missiyäse wäkilläre qatnaştı
AQŞ ilbaşı Donal’d Tramp Aq Yortta täwge tapkır iftar aşı ütkärde. Anda qayber möselman däwlätläreneñ Vaşingtondağı çit il missiyäse wäkilläre qatnaştı. Aralarında töreklär dä bar. Uzğan yıl Tramp, Aq Yort tradiśiyäsen çitkä qağıp, iftar aşı ütkärmägän ide. Bıyıl da ul aş mäclesenä az keşe çaqırdı.
Awız açqannan soñ, Tramp qısqa gına çığış yasadı. Ul cıyıluçılarnı ramazan ayı belän täbrik itte häm xalqınıñ kübese möselman bulğan illärneñ wäkillären Aq Yortta qunaq itüdän qanäğat’ buluın belderde.
Şul uq waqıtta, Trampnıñ islamğa qarşı fikerlärenä häm iftarğa çaqırmawına rizasızlıq belderüçe qayber möselman ictimağıy oyışmaları Aq Yort qarşındağı Lafayette parkında üzläreneñ iftarın ütkärde. Anda Amerika – İslam xezmättäşlege şurası häm Tön’yaq Amerika islam cämğıyäte şikelle AQŞta tanılğan oyışmalarnıñ äğ’zaları bar ide.
AQŞnıñ êlekkege ilbaşları Bill Klinton, Djordj W. Buş häm Barak Obama çorlarında yaqınça 20 yıldır Aq Yortta tradiśion iftar aşı ütkärelde. Tramp bu ğadätne tanımıyça uzğan yıl iftar uzdırmadı häm cämäğat’çelekneñ tänqıyt’ utına totıldı.
