Gvatemalada Fuêgo yanartawı şartladı
Hälakättä kimendä 25 keşeneñ ğomere özelüen söylilär
Gvatemalada Fuêgo yanartawı şartlawı näticäsendä, berençel mäğ’lümatlarğa kürä, 25 keşe ülde, distälärçä keşe yaralandı. Fuêgo başqala Gvatemaladan 40 kilometr yıraqlıqta urnaşqan.
Yanartaw şartlağannan soñ hawağa taşlar, töten häm köl oça. Bäla-qaza belän idarä itü milli oyışması beldergänçä, ber lava küle Äl-Rodeo awılındağı yortlarnı yuq itkän. Êçendäge yäşäwçelärneñ yanıp ülüen farazlıylar.
Tabiğıy hälakättä kimendä 25 keşeneñ ğomere özelüen söylilär. Alar arasında balalar häm yärdäm oyışmaları xezmätkärläre dä bar.
Däwlät başlığı Djimmi Morales kimendä 3 töbäktä cimerülär buluın belderde. Ul milli aşığıç xäl planı ğamälgä kerüen söyläde. Xalıqqa köl yañğırınnan saqlanu öçen maska tağarğa kiñäş itelde.
Yanartaw şartlawı näticäsendä tuplam 1,7 million keşeneñ täêsirlänüe xäbär itelä. 3 meñ 100 keşe öylärennän êvakuaśiyälängän. Êzläw-qotqaru êşläre däwam itä.
