Angliyada mammografiya ğawğası

Angliya xökümäte beldergänçä, ildä sanaq xatası säbäple kükräk tikşerügä çaqırılmağan küp sanda xatın-qıznıñ yaman şeştän ğomere özelgän buluı bar. Sälamätlek saqlaw ministrı Djeremi Xant ülüçelärneñ sanı 135 belän 270 arasında dip söyli.

2009nçı yıldan başlap bügengä qadär 68-71 yäş’ törkemenä kerüçe 450 meñ xatın-qızğa mammografiya öçen çaqıru cibärelmäwe açıqlanğan. Bu sanaq programmasındağı algoritm yalğışınnan kilep çıqqan. Näticädä 70 yäşenä yaqınlaşqan xatın-qızlarnı sistema avtomat räweştä isemlektän töşerep qaldırğan. Çaqıru cibärelmägännärneñ isemnäre bu ay axırına qadär açıqlanıp, alarğa mammografiya yasalaçaq.

Angliya sälamätlek saqlaw üzäklärendä 50-70 yäş törkemenä kerüçelärgä kükräk yaman şeşennän tikşerü tüläwsez ütkärelä.