Tramptan yaña belderü

AQŞ ilbaşı Donal’d Tramp Twitterda tağın Süriyä belän bäyle yazu urtaqlaştı. Anıñ kiçäge fikerläre könüzäk mäs’älägä äwerelde häm böten dön’yanı der selkette. Bügen isä Amerika prezidentınnan yaña kön tärtibe. “Süriyägä qayçan höcüm itäçägebezne äytmädem. Xäzer ük bärüebez dä bar, bötenläy bärmäwebez dä. Niçek kenä bulmasın, minem qul astında  AQŞ töbäktän DEAŞnı sörü öçen zur êş başqardı. Bezgä tiyeşle “Räxmät, Amerika” qayda?”-di Tramp.

AQŞ ilbaşı Tramp Süriyäneñ Duma rayonında 7nçe aprel’dä bulğan ximik höcüm xäbärlärennän soñ Bäşşar Äsädne “xaywan” dip atadı.

Kiçä isä Tramp Rusiyägä Twitterdan yanadı. Ul Süriyägä “aqıllı raketalar” cibäräçägen belderde. 40 minuttan tağın ber yazma çıqtı. Anda Amerika prezidentı Rusiyä belän mönäsäbätläreneñ Salqın Suğış yıllarındağıdan da naçar buluın äytä. “Monıñ kiräge yuq. Rusiyäneñ iq’tisadıy yärdämgä ixtıyacı bar häm bez anı räxätlänep êşli alabız. Bezgä xezmättäşlek itärgä kiräk. Qoral belän yarışunı tuqtatıyq”,-dide Tramp.