Sergey Lavrov: “London üzen xaqlı çığarırğa mataşa”

“Noviçok” isemle ağulı matdäneñ Rusiyädä Saratov şähärendä çığarıluı turındağı süzlärgä Tışqı êşlär ministrı Sergey Lavrov cawap birde. Ul monı Londonnıñ nigezsez ğayepläwlären xaqlı kürsätergä omtıluı dip bäyäli.

“Angliya Aleksandr Litvinenko, Boris Berezovskiy häm Aleksandr Perepeliçnıy oçraqlarındağı şikelle ük qartaların kesäsendä totu urınına, alarnı östäl östenä çığarıp quyıp, açıq, ğadel şäkeldä häm Ximik qorallarnı tıyu oyışması tärtipläre quşqança kiñäşläşü häm çişeleş êzläwne qabul itkängä qadär, Londonnıñ mönäsäbätenä aqlaw tabılmayaçaq”,-dide Lavrov.  

“Noviçok” isemle ağulı gaz êlekkege rus agentı Sergey Skripal’ häm qızı Yuliyağa höcümdä qullanılğan ide. Angliya bu waqıyğada Rusyä xökümäten ğayepläde. Älege nigezdä ike arada diplomatik krizis başlandı.