Franśiyada “qara sişämbe”

Franśiyada timer yulı, hawaçılıq (aviaśiya), çüp cıyu häm ênergetika tarmaqlarındağılar êş taşladı

943558
Franśiyada “qara sişämbe”

Franśiyada timer yulı, hawaçılıq (aviaśiya), çüp cıyu häm ênergetika tarmaqlarında êşläwçelär belän uquçılar tarafınnan oyıştırılğan çaralar başlandı. Aña “qara sişämbe” iseme birelde.  Êş taşlawçılar timer yulı reformasına rizasızlıq belderä. Alarnı ilneñ iñ zur hönärçelär berlekläre yaqlıy. Çaralar 28nçe iyün’gä qadär däwam itäçäk.

Xalıqara timer yullar oyışması citäkçelege beldergänçä, şirkättä êşläwçelärneñ 48%ı, maşinistlarnıñ 77%ı çarada qatnaşa.

İldä şähär arası tizyöreşle poyızdlarnıñ barı tik 12%ı säfärgä çıqqan. Näticädä irtänge säğat’lärdä  êşkä aşığuçı 100 meñnärçä keşe poyızdda urın tabarğa tırışqan. Parijda häm aña yaqın bistälärdäge stanśiyälärdä êteş-törteş başlanğan. Keşe bik küp tulu näticäsendä poyızdlar quzğala almağan. Poliśiya häm jandarmeriyä xalıqnı stanśiyadan yıraqlaştırırğa mäcbür bulğan.    

            Êşçelär timer yullardağı üzgäreş qanunı belän däwlät xezmätkärlärenekenä oxşaş xaqlarınıñ yuqqa çığuı häm tarmaqnıñ xosusıylaştırıluına borçılıp rizasızlıq belderä. Bu êş taşlaw  könenä 20 million yevroğa töşäçäk.

Transport ministrı Êlizabet Born bu çaralar säbäple ildä 3 ay baraçaq butalçıqlıq başlanuın belderde. Ul xökümätneñ kiregä adım yasamayaçağın söyli.

Timer yullardağı êş taşlaw häm säfärlärneñ ğamäldän çığuı säbäple Franśiya häm başqa Awrupa illäre arasında transport êlemtäseneñ aqsayaçağı farazlana.  

Moña qadär 22nçe häm 23nçe martta êş taşlağan xalıqara hawa yulları şirkäte Êyr Frans xezmätkärläre dä timer yulçılarğa quşıldı. Alar xezmät xaqlarınıñ 6%qa artuın taläp itä.

İldäge küpsanlı çüp cıyu häm êşkärtü üzäkläre xezmätkärläre dä bilgesez waqıtqa qadär êş taşladı. Timer yulçılarğa ênergetika tarmağınnan da teläktäşlek kürsätälär. Alar êşläw säğat’läre häm tüläw säyäsätenä rizasızlıq belderä. Ênergetiklar xökümätneñ reforma paketları häm xosusıylaştıru maqsatları belän ildä 3 aylıq xaosqa yul açuın farazladı.

Bu êş taşlawlarnıñ soñraq böten il buyınça massaküläm uram cıyınnarına äwereläçäge dä söylände.     

Franśiyada bu êş taşlaw dulqınnarı cäyelgän arada uquçılar da mäğarif häm universitetqa qabul itüdäge tözätülärgä rizasızlıq belderep çaralar oyıştırdı. Şul säbäple 50gä yaqın yuğarı uqu yortında belem birü awırlıq belän bara.



Bäyläneşle xäbärlär