Höcümgä dönyadan reakśiyalar

39 keşeneñ ğomere özelgän, dürtese awır 65 keşe yaralanğan höcümgä dönyanıñ dürt ber yağınnan reakśiya belderelde.

Yasalğan yullamalarda Törkiyä belän teläktäşlek citkerelde häm xalıqara terrorçılıq belän köräşneñ möhimlegenä iğtibar yünältelde.

Amerika Quşma Ştatları İlbaşı Barak Obama, gäyepsez keşelärneñ häläq buluınnan köyeneçen belderep, ğomer özelgännärneñ tuğannarınıñ qayğısın urtaqlaştı.

Obama ixtıyac bulğan oçraqta Törkiyä räsmilärenä kiräkle yaqlaw häm yärdämneñ kürsätelüe mäs’äläsendä dä törkemenä boyırıq birde.

Aq Yortnıñ Milli iminlek şurası süzçese Ned Prays ta açıqlawında: “Amerika Quşma Ştatları İstanbuldağı qurqınıç terror höcümen iñ köçle räweştä gäyepli”, - dip äytep, NATO äğzase berlektäş Törkiyä belän terrorçılıqnıñ härtörlesenä qarşı yärdämläşü êçendä bulularına da basım yasadı.

Rusiyä Federaśiyäse Däwlät başlığı Vladimir Putin da höcüm arqasında İlbaşı Räcäp Tayyip Ärdoğanğa qayğınamä cibärde.

Kreml’dän yasalğan belderügä kürä, Putin xatında:“Yaña yıl qotlawlarınıñ urtasında gäyepsez keşelärneñ üterelüennän tağın da naçarraq cinayätne canlandıru da xätta bik awır. Fäqät äxlaqi keşelek qimmätläre terrorçılar öçen tulısınça yat añ-fiker. Urtaq wazıyfabız – terror agressivlığına täwäkkäl räweştä cawap birü”, - dip äytte.

Putin ayıruça Rusiyäneñ terrorçılıq belän köräştä Törkiyäneñ ışanıçlı partnyorı bulırğa däwam itäçägen dä belderde.

Rusiyä Federaśiyäse Premyer-ministrı Dmitriy Medvedev ta, Törkiyä Premyer-ministrı Binali Yıldırımğa şaltıratıp, qayğısın urtaqlaştı häm teläktäşlek yullamasın citkerde.

Medvedev çığanağı qaydan ğına bulmasın Rusiyäneñ Törkiyäneñ terrorçılıq belän köräşen köçle räweştä yaqlawın rasladı.

Telefon söyläşüe waqıtında İstanbuldağı terror höcümeneñ Törkiyä belän Rusiyäneñ töbäktä tınıçlıqnı daimi qılu öçen üz östenä alğan iniśiativa belän ber ük waqıtqa turı kilüeneñ oçraqlı bulmawı, bu höcümnärgä qaramastan ike ilneñ töbäktä iminlek häm totrıqlılıqnıñ urnaştırıluı öçen konstruktiv rol’ uynarğa däwam itäçäge assızıqlandı.

Tön'yaq Kipr Törek Cömhüriyäte İlbaşı Mostafa Aqıncı da yasağan qayğınamäsendä häm gäyepläw yullamasında:"Tönge klubta gäyepsez keşelärgä yasalğan wäxşi höcümne gäyeplibez. Häläq buluçılarnıñ tuğannarınıñ häm Törkiyäneñ qayğısın urtaqlaşabız”, - dip äytelde.

Azärbaycan İlbaşı İlham Aliyev ta İstanbuldağı terror höcüme arqasında İlbaşı Räcäp Tayyip Ärdoğanğa qayğınamä cibärde.

Höcümneñ Azärbaycannı bik nıq tetränderüen äytüçe Aliyev terrorçılıqqa qarşı iñ kisken häm qatği räweştä köräş alıp barıluın teläwlärenä basım yasadı.

Aliyev höcümdä ğomere özelgännärneñ ğailäläre häm törek xalqınıñ Azärbaycan xalqı häm üze isemennän qayğısın urtaqlaştı.

İstanbuldağı terror höcüme arqasında Franśiya İlbaşı Fransua Olland, Germaniya Kanślerı Angela Merkel, Fälästin Däwlät başlığı Mahmud Abbas, İzrail İlbaşı Reuven Rivlin, NATO Ğomum särkätibe Yans Stoltenberg, Awrupa Berlegeneñ tışqı mönäsäbätlär häm iminlek säyäsäte yuğarı wäkile Federika Mogherini, Awrupa Berlege komissiyasınıñ Küçenü (migraśiya) häm watandaşlık êşlärennän cawaplı äğzase Dimitris Avramopoulos, Awrupa Parlamentı başlığı Martin Schulz, Angliya Tışqı êşlär ministrı Boris Jonson, Kanada Tışqı êşlär ministrı Stefan Dion, Awstriya Tışqı êşlär ministrı Sebastian Kurz, Belgiya Tışqı êşlär ministrı Didier Reynders, Amerikan-İslam mönäsäbätläre şurası başlığı Nihad Awad ta, höcümne gäyepläp, Törkiyäneñ qayğısın urtaqlaştı häm teläktäşlek xislären citkerde.

Meksika tışqı êşlär ministrlığınnan yasalğan yazma belderüdä, terror höcüme kisken räweştä gäyeplänep, Meksikanıñ Törkiyä belän teläktäşlek êçendä buluına basım yasaldı.

Berläşkän Millätlär Oyışması İminlek şurası belän Vatikan da höcümne kisken räweştä gäyepläp çıqtı.