Yawlıqlı xatın-qızğa yaqlaw

Kanadada yawlıqlı xatın-qıznı yaqlaw kürsätelgän.

Quebec vilayäte Yuğarı Mäxkämäse möselman xatın-qıznıñ yawlıqlı buluın nigeznamä itep kürsätep, mäxkämä êşenä qaramağan sudyanı xatalı dip beldergän.

Qararnı açıqlağan Quebec Yuğarı mäxkämäse äğzase, sudya Wilbrod Decarie: “Sudya Eliana Marengo totışınıñ xoquqi nigezeneñ bulmawı kürelgän. Mäxkämäbez Rania äl-Alloulnıñ xis-toyğıları belän urtaqlaşa häm üzenä qarata kürsätelgän totıştan borçu toya,” – digän.

Sudya Decarie yawlıqqa qarşı belderelgän rizasızlıqlarnıñ Kanada Konstituśion Mäxkämäse tarafınnan monnan alda da kire qağıluın xäterlätkän.

Qararğa söyengän Rania äl-Alloul isä älege totışnıñ yalğış buluın äytkän başqa sudya açıqlawınıñ üze öçen bik möhim buluın citkergän.

Alloul härkemneñ telägänçä kiyenüen, qaysı dindä bulsa da, mäxkämägä barğanda qurıqmaw zarurlığın häm üzen imindä xis itüen teläwen assızıqlağan.

Motreal şähärendä uzğan yılnıñ fevral’ ayında barlıqqa kilgän waqiğada Quebec vilayäte Mäxkämäse sudyası Eliana Marengo mäxkämä däğwası bulğan Rania äl-Allouldan yawlığın saluın sorağan ide.

Möselman xatın-qızğa sudya ike närsä täqdim itkän, berençese yawlıqnı salu, ikençese advokat yawlap, mäxkämä utırışlarına anı cibärü.

Alloul isä advokatqa tüliyäçäk aqçasınıñ bulmawın häm yawlığın da salmayacağın beldergän ide.

Şunnan soñ utırışnı däwam ittermägän Marengo anı waqıt birmiçä kiçektergän.

Kanada premyer-ministrı Justin Trudeau belän ber rättän şaqtıy säyäsätçe häm keşe xoquqları oyışmaları reakśiya kürsätkän waqiğa xaqında advokatlarnıñ da taläp itüenä qaramastan sudya Eliana Marengo ğafu ütenmägän.