"Här kön höcümnärne buldırmıy qalabız"

Franśiya premyer-ministrı Manuel Valls ildä här könne terror höcümnärenä kirtäneñ quyıluın äytkän.

Valls Europe 1 radiosı belän iTele televideniyesınıñ urtaq tapşıruında qunaq bulğan.

Franśiyadä terror höcüme riskınıñ iñ yuğarı däräcagä citüen beldergän Valss bu risknıñ citdilegen ayıruça soñğı könnärdä tağın da yaxşı kürülären açıqlağan.

Premyer-ministr: “Poliśiyabez, jandarmeriyabez, küzläw xezmätebez däwamlı bularaq terror höcümenä kirtä quya, terrorğa bäyläneşle oyışmalarğa qomaçawlıy. Terror höcüme riskı iñ yuğarı däräcädä, maqsatta barıbız da bar. Bu atnada ğına 2 zur höcüm buldırılmıy qaldı,” – digän.

Franśiyadä 10-15 meñ keşeneñ radikal’ törkemnärneñ täêsirendä buluın citkergän Valss Franśiyadän kitkän yaqınça 700 keşeneñ dä xäzerge waqıtta Süriyä häm Ğiraqta “DEAŞ” terror oyışması saflarında suğışuın beldergän.

İldä “DEAŞ”qa bäyläneşe bulğan meñ 350 keşeneñ bilgelänep, saq astına alınuın äytkän premyer bolardan 293eneñ dä terror oyışmaları êçendä buluınıñ öyränelüen açıqlağan.

Atna başında poliśiya Parijnıñ simvollarınnan bulğan Notre Dame kafedrale yanında yar buyına quyılğan ber transport çarasında 7 gaz ballonı tapqan ide.

Gaz ballonnarı belän bäyle bularaq êzlängän 3 xatın-qıznı qulğa alğanda xatın-qızlardan berse poliśiyağa pıçaq belän höcüm itärgä cıyınğan häm poliśiya tarafınnan açılğan utta yaralanğan ide.