Savçenkonıñ sälamätlege naçaraya bara
Totıq itep alınıp Rusiyägä urlanğan ukrain xatın-qız oçuçısı Nadejda Savçenko sälamätlegeneñ naçaraya başlawı belderelgän.
Rusiyä mäxkämäse üzen 22 yıl törmä cäzasına xökem itkännän soñ açlıq aktsiyäsen däwam itterüçe Ukraina oçuçısı häm xalıq ışanıçlısı Nadejda Savçenkonıñ sälamätlege naçaraya bara.
Savçenkonıñ advokatı Nikolay Polozov Ukrainada ber televizion kanalına yasağan belderüendä, yaqlanuçısınıñ açlıq aktsiyäsenä barı tik su êçep kenä däwam itüen xäterlätep, kileş-kilbäteneñ êçkän sunı qabul itmäslek xälgä kilüen äytkän.
Polozov: "Savçenkonıñ sälamätlege tağın da naçaraya başladı, êçkän sunı organizmı qabul itmäs buldı. Xäzer ul sälamätlek wazğiyäten totrıqlı tota alu öçen mineralle su êçä ala. Şulay da ber köndä 400-500 gramm yuğalta. Xäzerge waqıtta ağırlığı 65 kilogramm", - dip assızıqlağan.
Ukrainanıñ könçığışında Rusiyä yaqlı separatistlarğa qarşı operatsiyälärdä üzixtiyarıy bularaq qatnaşqan Ukraina ğäskäreneñ berdänber xatın-qız pilotı ölkän leytenant Nadejda Savçenko 2014nçe yılda çınbarlıqta bulmağan “Lugansk xalıq cömhüriyäte"neñ separatistları tarafınnan totıq itep alıp, Rusiyägä urlanğan ide.
Operatsiyalar waqıtında Rusiyä jurnalistlarınıñ üterelüenä yärdäm itüdä gäyeplängän Savçenko 22 yıl törmä häm Rusiyä Federatsiyäse çigen qanunsız räweştä uzudan da 30 meñ rubl külämendä aqçalata cäazağa (ştrafqa) xökem itelgän ide.
