Obama Tönyaq Koreyağa yaña sanktsiyälär qanunın raslağan

Amerika Quşma Ştatları ilbaşı Barak Obama atom-töş qoralı programması belän bäyle eşçänleklären däwam itterüçe Tönyaq Koreyağa yaña sanktsiyälärne üz eçenä aluçı qanunnı raslağan.

AQŞ Kongressında uzğan atnada raslanğan yaña qanun Obama qul quyğannan soñ ğamälgä kergän.

Älege qanun belän Tönyaq Koreyanıñ atom-töş programması ,keşe xoquqların bozu häm kiber cinaytlärgä qarşı köräş qısasında tağın da kübräk çaralar kürü küzdä totıla.

Tönyaq Koreyağa yaña sanktsiyälärneñ il iqtisadına zur zıyan kiteräçägen yaqlawçı Qıtay isä elegräk mondıy sanktsiyalärgä qarşı buluın beldergän ide.

Tönyaq Koreyanıñ soñğı däwerdä vodorod bombasın sınap qarawı häm ğalämğä raketa cibärüe arqasında kiyerenkelek artqanda Vaşington häm Seul citäkçelekläre urtaq saqlanu çaraları belän bäyle söyläşülären arttırdı.