Ukrainadan rekord kompensatsiya taläbe

Kiev citäkçelege Rusiyädän "trillionlıq" kompensatsiya sorarğa äzerlänä.

207818
Ukrainadan rekord kompensatsiya taläbe

Ukraina Premyer-ministrı Arseniy Yatsenyuk, Rusiyäneñ Ukrainada terrorçılıqnı finanslawın belderep, terrorçılıq belän köräştä Berläşkän Millätlär Oyışması konventsiyäsen bozuı gäyebe belän Rusiyä Federatsiyäsenä qarşı xalıqara mäxkämälärgä möräcäğät itäçäklären häm Rusiyädän "trillionlıq" kompensatsiyälär taläp itäçäklären äytte.

Premyer-ministr Arseniy Yatsenyuk Ministrlar Şurası cıyılışında yasağan çığışında Rusiyä arqasında zur yuğaltularğa duçar buluların, şuña kürä xalıqara mäxkämälärdä “Rusiyädän trillionlıq zararlarnıñ qaplanuın taläp itäçäklären” belderde.

Yatsenyuk: "Ukraina Rusiyä Federatsiyäsenä qarşı Awrupa keşe xoquqları mäxkämäsendä öç däğwa açtı. Ukraina duçar bulğan yuğaltularnıñ qaplanuı öçen Rusiyädän trillionlıq kompensatsiya sorayaçaqbız”, - dip äytte.

Yatsenyuk taläp iteläçäk kompensatsiya miqdarı häm monıñ qaysı aqça berämlege buluı xaqında töğäyen açıqlaw yasamadı. Ukraina tışqı eşlär ministrı Pavlo Klimkin monnan alda yasağan belderüendä Rusiyäneñ ilen 1 trillion 80 milliard grivna (yaqınça 72 milliard dollar) külämendä zararğa duçar itüen äytkän ide.

Kiev citäkçelege ilneñ könçığışında bıyıl yıl başınnan birle däwam itüçe Rusiyä yaqlı qorallı xäräkätka Kremlneñ yärdäm itüe fikeren yaqlağan bulsa, Mäskäw monı kire qağa.

Rusiyä tarafdarları belän Ukraina xärbiläre arasındağı bäreleşlärdä bügengä çaqlı yaqınça 4 meñ keşeneñ häläq buluı, könçığıştağı şahär häm qasaba asqormasınıñ häm iqtisadınıñ zur zıyan kürüe belderelä.


Etiketlar:

Bäyläneşle xäbärlär