Berlin diwarı cimerelüeneň 25 yıllığı
Germaniyada Berlin diwarı cimerelüeneň 25 yıllığı törle çaralar belän qotlana
Başqala Berlinda “Lichtgrenze”, yägni “Yaqtılıq diwarı” isemle çara qısalarında şähärne 1961nçe yıldan soň 28 yıl buyı ikegä bülep torğan Berlin diwarı urın alğan 15 çaqrımlıq urınğa geliy belän qabartılğan 8 meň tiräse şar quyıldı.
Meňnärçä keşe Federal’ mäcles, Brandenburg qapqası, Checkpoint Charlie, East Side Galary kebek elektän Berlin diwarı uzğan şaqtıy üzäktä oyıştırılğan “Yaqtılıq diwarı” çarasında qatnaştı. Almannar häm şähärgä kilgän turistlar açılğan kürgäzmälär häm iskä alu çaralarına ağıldı.
Tarixi Brandenburg qapqasında yäkşämbe könne “Bäysezlek öçen qıyulıq” şiğare belän bäyräm oyıştırılaçaq.
Çarada şaqtıy tanılğan cırçı häm törkemnär çığış yasayaçaq. Könçığıştan Könbatış Berlinğa qaçqan waqıtta ğomere özelüçelär dä iskä alınaçaq programmanıň azağında “Yaqtılıq diwarı” çarasındağı şarlar hawağa cibäreläçäk.
Germaniya Kantslerı Angela Merkel da Diwar muzeyında oyıştırılaçaq çarada qatnaşaçaq.
Elekke Sovyetlar Berlegendä däwlät başlığı Mihail Gorbaçovnıň açıqlıq häm yaňadan qorılış säyäsäte belän Polşadağı hönärçelär berlege çaraları belän elekke könçığış blokında başlanğan reforma barışı 1989nçı yılda Vengriya häm Könçığış Germaniyağa dä tä’sir itte. Könçığış Germaniyada keşelär bäysezlek öçen 1989nçı yılnıň cäy aylarında uramnarğa ağıldı. Bu çığışlar näticäsendä 1989nçı yılnıň 9nçı noyabr könne xalıq Berlinnı 28 yıl buyı ayırıp toruçı “Oyat diwarın” cimerde. Bu ike Germaniyaneň berläşüenä säbäpçe buldı.
Könçığış Germaniya rejimında küp sandağı keşe çik buyın häm Berlin diwarı aşa çıqqanda üterelde. Bu kürsätkeç 136 bulsa da, yaqtı dönyadan kitüçelärneň kübräk buluı çamalana.
