30 million bala-çağa mäktäptä belem aludan mäxrüm qala

Bäreleş töbäklärendäge 30 million bala-çağa mäktäptä belem aludan mäxrüm qala.

Berläşkän Millätlär Oyışmasınıñ Balalarğa yärdäm kürsätü fondı UNİCEF bar dönyada 30 million balanıñ suğış yäisä illärendäge ğadättän tış xäl arqasında mäktäptä uqıy almawın belderde.

UNİCEFtan yasalğan açıqlawda sentyabr ayında küp sandağı ildä balalarnıñ mäktäpkä baruı, läkin millionnarça balanıñ bu mömkinlektän mäxrüm qaluı citkerelde.

Bäreleşlärdä mäktäplärneñ maqsat itep alınuı assızıqlanğan açıqlawda Urta Afrika Cömhüriyätendäge mäktäplärneñ öçtän ber öleşenä utnıñ törtelüe, bombalanuı yäisä qorallı törkemnär tarafınnan yawlap alınuı urın aldı.

Könbatış Afrikada küzätelgän ebola virusınıñ da belem aluğa tä’sir itüe belderelgän açıqlawda virus arqasında Liberiya häm Sierra-Leoneda başlanğıç häm urta mäktäplärneñ yaña yılğa qadär yabıq bulaçağı, bu wazğiyättän 3 million yarım uquçınıñ tä’sirlänäçägenä basım yasaldı.

UNİCEF açıqlawındağı qayber möhim kürsätkeçlär tübändägeçä: “Ğazzädä 300 meñ keşe waqıtlıça yäşagän 100dän artıq mäktäpneñ tözekländerelüe zarur.
Süriyädä mäktäp çorındağı balalarnıñ yartısın täşqil itkän 3 million bala mäktäptä belem aludan mäxrüm qala.

Ukrianada 290 tiräse mäktäp bäreleşlär arqasında zıyan kürde yäisä bötenläy cimerelde.”

Açıqlawda bäreleşlärdän tä’sirlängän balalarnıñ häm çit illärgä kitärgä mäcbür qalğan uquçılarnıñ uqıy aluları öçen UNİCEFnıñ yärdäm kürsätüe citkerelep, barlıq taläplärneñ qanäğatländerelüe öçen tağın da kübräk fondka ixtıyac toyuı assızıqlandı.