Ukrainada utnı tuqtatu ömete

Ukraina citäkçelege belän ilneň könçığışındağı Rusiyä Federatsiyase tarafdarlarınıň söyläşü östäle artına utıruları kötelä.

Minskta uzaçaq söyläşülärdä Rusiyä häm Awrupa İminlek häm Xezmättäşlek oyışması AGİT wäkilläre dä qatnaşaçaq.

Ukraina däwlät başlığı Petro Poroşenko tınıçlıq urnaştıru planınıň çınğa aşaçağına ömet itep, cıyılış başlanaçaq köndezge säğatlärdä utnı tuqtatırğa boyıraçağın äytkän ide.

Separatistlar isä Minskta krizisnı säyäsi yul belän çişäçäk kileşü tä’min itelgän oçraqta utnıň tuqtıy alaçağın citkergännär ide.

Söyläşülärdän alda port şähäre bulğan Mariupolda bäreleşlär çıqtı.

Rusiyä tarafdarları şähärgä kerergä tırışqan waqıtta xökümät berlekläreneň saqlanuğa küçüe belän şaqtıy şartlaw barlıqqa kilde.