BMO iminlek şurası İzrailneñ Ğazzägä höcümnären söyläşü öçen cıyıldı

Berläşkän Millätlär Oyışması iminlek şurası İzrailneñ Ğazzägä yünälgän qanlı höcümnäre xaqında söyläşü öçen tönlä cıyıldı.

Nindi dä bulsa qanun proyektı yäisä belderge äzerläw kön tärtibenä kilmägän cıyılışta BMO iminlek şurası äğzası bulğan illär härwaqıttağıça mäs’älä belän bäyle fikerlären citkerde.

Şura äğzalarınıñ küpçelege İzrailneñ iminlek borçılularınıñ legal buluın belderü belän çiklände.

Amerika Quşma Ştatları , Avstraliya häm başqa küp kenä il wäkile üz çığışında Hamasnıñ raketa höcümnären qabul itelä almaslıq dip bäyäläde häm bu höcümnär qarşında İzrailneñ üzen saqlawınıñ legal buluına basım yasadı.

Berläşkän Millätlär Oyışması ğomum särqätip urınbasarı Jeffrey Fetlman utnı tuqtatunıñ Ğazzädän cibärelgän raketalar bozuın däğwa itep, “İzrailneñ legal xoquqı bar. Ğazzädän İzrailgä niçek turı kilsä şulay raketa cibärüne ğayeplibez”dip belderde.

Feltman BMO ğomum särqätibe Ban Ki Moonnıñ bügen (19 nçı iyüldä) Yaqıın Könçığışqa kitäçägen häm qırıslıqnı tuqtatu öçen söyläşülär ütkäräçägen citkerde.

Cıyılışta çığış yasawçılar töbäktä kiyerenkelekne kimetü, tınıç xalıqnı saqlaw, humanitar yärdäm ireşterügä röxsät birü häm yaqlar arasında utnı tuqtatu iğlan itü kiräklegenä basım yasadı.

Cıyılış taläp itkän Yordaniya wäkile İzrailne açıq räweştä ğayepläwçe berdänber äğza buldı.

Fälästinneñ daimi wäkile Riyad Mansur iminlek şurasında yasağan çığışında küz yäşlären totıp tora almadı, İzrailne ğayepläde, aşığıç räweştä utnı tuqtatırğa çaqırdı, Ğazzädäge blokadanı beterü turında qarar qabul itärga çaqırğan Mansur Ğazzädäge krizisnı çişü öçen xalıqara yärdämnärne arttırunı soradı.

İzrailneñ daimi wäkile Ron Prosor isä Hamasnı ğayepläp raketa höcümnäreneñ däwam itüe arqasında üzlären saqlaw öçen ciröste operatsiyäsennän başqa çara qalmawın alğa sörde.