Belem ofığı 49

Bügenge yazmada Anadolunıñ üzgä şähäre bulğan Malatyağa säfär yasarbız. Maqsatıbız bu şähärne çit illärdän kilüçe uquçı yäşlärne üzenä cälep itüçe İnönü Universitetın tanıtu, läkin uqu yortı qadär eçendä urın alğan şähärneñ dä möhim buluın beläbez. Monıñ öçen başta Malatyanı añlatıp uziq.

Elekke iseme Maldia bularaq belengän, tarix buyı küp sandağı tsivilizatsiyalärne yäşätkän Sälcuqlı häm Ğosmanlı mädäniyätlären üstergän, Anadolunıñ yulçatırlarınnan berse bulğan tiñsez şähärder Malatya.
Törkiyädä häm dönyada örek citeşterüdäge liderlığı belän tanılğan Malatya traditsion arxitekturası, tigez yäşäw urınnarı, planlı şähär tözeleşe, mädäniyät häm säwdä üzäkläre, däwlät teatrı belän töbägendäge zur häm üskän vilayätlärdän berse bulıp tora.

Tarixi kurgan, säwdä üzäge, munça, küper häm mäçetläre belän cäyen-qışın qızıqsınu üzägeder Malatya. Zamança häm matur urınnarı belän dä 4 yıl fasılında da üzenä cälep itä ul.
Xäzer isä Malatyada urın alğan İnönü universitetın tanıtiq. Härwaqıtta bulğanı kebek berençe itep uqu yortı rektorı yanına barabız. Bu tapqır süzne Prof. Dr. Cämil Çälikkä biräbez häm yäşlärneñ İnönü universitetın ni öçen saylawların belergä telibez.

“Qorılğan 1975nçe yıldan bügengä qadär tizlek belän qamilläşkän häm üsüçe universitetıbız ilebezneñ ğilem, töşençä, sänğat, iqtisad, sälamätlek häm sotsial’ ölkälärendä üzen isbat itkän üzençälekle keşelär citeşterde.

Işanıç häm xozur bulğan, çitläşterü häm ideologik töşençälär basımı bulmağan, sälamätlek saqlaw, sotsial’, mädäni häm sport belän bäyle ixtıyaclar qanäğatländerelgän İnönü universitetı zamança şähärçege häm üzençälekle beleme belän alğı planda. Yäşlär uqu yortıbızğa monıñ öçen östenlek birä.”

İnönü universitetı şähärçegendäge mömkinleklärne öyränep kitik.
“Student räxät yäşi alaçaq şähärçek alanı üzençälekle belem alu qorılmaları belän bulğanı qadär küp maqsatlı mädäniyät zalları, sotsial’ qorılmalar, sport häm yal itü alannarı belän därestän tış waqıtnı yaxşı uzdıruı öçen mömkinleklär täqdim itä.

İnönü universitetı ğariplärgä belem birü belän ber rättän “kirtäsez şähärçek” eşçänlege belän dä Törkiyäneň aldınğı yuğarı uqu yortlarınnan berseder.
Şähärçektä barlıq şartlar tudırılğan, uquçılar böten ixtıyacların şähärçektän çıqmıyça qanäğatländerä ala.

Barlığı 3 meň 300 student yäşi ala torğan İnönü universitetı şähärçegendä 2500 keşelek qızlar tulay torağı, 500är urınlı şäxsi qızlar häm yegetlär tulay toraqları bar.”

Xörmätle rektor äfändedän şähärçektäge sotsial tormış turında qızıqsınabız:
“İnönü universitetında uquçı yäşlärneň töşençä dönyasınıň üsüenä öleş kertep, estetik qaraşların qamilläşteräçäk sanğät eşçänlekläre onıtılmadı.

700 keşelek konferentsiya zalı, 3 seminar zalı häm bal zalı belän barlığı 5 zaldan toruçı ilebezneň mädäniyät üzäklärennän berse bulğan İnönü universitetınıň Turgut Özal kongress häm mädäniyät üzägendä küp sandağı kongress, panel, simpozium, kürgäzmä häm çara oyıştırıla. Här yıl uzdırıluçı Yaz bäyrämnäre, qısqa metrajlı film festivale, Arguvan törek xalıq cırları könnäre häm Karyera könnäre uquçı yäşlärneň sotsial’ tormışın bizäwçe eşçänleklär bulıp tora.

Uquçı cämğiyätläre cähatennän dä bay bulğan uqu yortıbız yäşlärneň buş waqıtların yaxşı häm uňdırışlı uzdıruların tä’min itä. Bu isä uquçılarnıň initsiator üzençäleklären häm üz-üzlärenä ışanuların arttıra.”