Törkiyä tışqı êşlär ministrınıñ Urta Aziya illärenä säfäre

Awraziya qaytawazı 64

1603896
Törkiyä tışqı êşlär ministrınıñ Urta Aziya illärenä säfäre

2021nçe yılnıñ 5nçe-10nçı mart könnärendä Törkiyä Cömüriyäteneñ Tışqı êşlär ministrı Mäwlüt Çavuşoğlu Urta Aziyanıñ öç ilenä (Törekmänstan, Üzbäkstan häm Qırğızstanğa) säfär yasadı. Vizıtı waqıtında Mäwlüt Çavuşoğlu şuşı illärneñ Däwlät başlıqları tarafınnan qabul itelde, tışqı êşlär ministrları häm baş ministr urınbasarları belän ike yaqlı mönäsäbätlärne qızıqsındırğan mäs’älälär tikşerde. Tışqı êşlär ministrlıqları arasında xezmättäşlek protokollarına qul quyıldı.

Mäwlüt Çavuşoğlu iñ êlek Törekmänstanğa kitte. Çavuşoğlu başqala Aşxabadta Törekmänstan İlbaşı Gurbanguli Bärdimöxämmädov belän küreşep, THY Törek hawa yullarınıñ yañadan Törekmänstanğa oçışlarğa başlawı häm Törkiyä yök maşinalarınıñ ildän uzuına röxsät birelüe mäs’äläsendä İlbaşınıñ raslawın aldı. Belengäne kebek, Törekmänstan pandemiya waqıtında hiçber hawa yulı şirkäteneñ ilga säfär yasawına röxsät birmi ide.

Törekmänstanda ênergetika mäs’äläse dä söyläşelde. Xäzär-Kaspiy ênergiyasınıñ urtaq êşlätelüe mäs’äläsendä Azärbaycan häm Törekmänstan arasında kileşü tözelgännän soñ Törekmänstan ênergiyasınıñ Törkiyä aşa Könbatışqa êksportı mömkin xälgä kilä başladı. Xäzär ênergiyasınıñ Törekmänstan, Azärbaycan häm Törkiyä tarafınnan urtaqlaşıp Törkiyägä häm Könbatışqa êksportınıñ bıyıl ütkäreläçäk ike yaqlı häm öç yaqlı yuğarı däräcäle oçraşularnıñ töp kön tärtiben täşkil itäçägen äytü yalğış bulmas. Çavuşoğlu da şuşı sammitlarnıñ häm kileşülärneñ nigezen äzerläw öçen Aşxabadta ide.

 

Tışqı êşlär ministrı Mäwlüt Çavuşoğlu Törekmänstannan Üzbäkstanğa uzdı. Çavuşoğlu Üzbäkstanda Hivä, Boxara, Sämärqand häm Taşkent şähärlärenä bardı. 7nçe mart könne Çavuşoğlu Üzbäkstan Baş ministr urınbasarı häm tışqı êşlär ministrı belän bergä Sämärqandta Törkiyä baş konsullığınıñ açılışın yasadı. İlbaşı Räcäp Tayyip Ärdoğannıñ bıyıl Üzbäkstanğa säfär yasawı kötelä.

 

Üzbäkstan oçraşuların tämamlawçı Çavuşoğlu annan soñ Qırğızstan başqalası Bişkäkkä kitte. Bişkäktä Mäwlüt Çavuşoğlu Qırğızstan Däwlät başlığınnan tış ilneñ Baş ministrı belän dä küreşep söyläşte. Tışqı êşlär ministrı Çavuşoğlu qırğız ministrları belän bergä Qırğızstan-Törkiyä Manas universitetı qarşındağı Sälamätlek saqlaw üzägen häm Pandemiya belän köräş laboratoriyasın açtı. Törkiyä tışqı êşlär ministrı bolarnı tözeläçäk mediśina fakul’tetınıñ berençe adımnarı bularaq açıqladı. Törkiyä mäğarif waqıfına bäyle mäktäpneñ bıyıl Bişkäktä açıluı kötelä. Mäğarif waqıfınıñ mäktäpläre Qırğızstannıñ mäğarif sistemasına zur öleş kertäçäk.

Tışqı êşlär ministrı Mäwlüt Çavuşoğlu säfär qılğan illär Törkiyäneñ saqlanu sänäğäte êşlänmäläre belän qızıqsına. Qarabax suğışında Törkiyä êşlänmäläreneñ bilgeläwçe rol’ uynawı Urta Aziya cömhüriyätläreneñ şuşı êşlänmälärgä iğ’tibarın tağın da arttırdı. Bıyıl Urta Aziya törki cömhüriyätläre Törkiyäneñ saqlanu sänäğäte êşlänmälären üz inventarenä östi ala. Belengäne kebek, Qazaqstan uzğan atnalarda Törkiyäneñ çılbırlı (bron’le) texnikasın sınap qaradı. “Aselsan” Qazaqstannan soñ Üzbäkstanda da êşxanä aça alaçaq.

Mönäsäbätlärneñ urnaşuınıñ 30 yıllığında Törkiyä törki cömhüriyätlär belän bağlanışların yaña êtapqa citkerergä teli. 2021nçe yılda liderlar yasayaçaq ike yaqlı säfärlär häm Törkiyädä uzdırılaçaq Törki Kiñäşmä sammitı törki cömhüriyätlär cähätennän yaña çornıñ başlanğıçı bulaçaq.

 

Yazma avtorı: Abdrasul İsakov



Bäyläneşle xäbärlär