Rusiya Federaśiyäse däwlät başlığı Vladimir Putinnıñ Yaponiya säfäre

Rusiya Federaśiyäse däwlät başlığı Vladimir Putin Yaponiyanıñ Rusiyägä sankśiyälär kertüe arqasında kiçektergän säfären 15 nçe dekabr’dä tormışqa aşırdı. Putin 2 könlek räsmi säfär qısasında başta prem’yer-ministr Abe belän Nagato qalasında küreşep söyläşte. Rusiya mediası Abeneñ Putinnı tuğan yağına çaqıruın maxsus ber jest bularaq bäyäläde. Söyläşülär ikençe könne Tokioda kiñäytelgän formatta däwam itte. Yaqlar ike il arasındağı iqtisadi, sośial’,säyäsi häm iminlek tarmaqlarındağı xezmättäşlek mäs’äläläre,Tön’yaq Koreya berençe çiratta bulu belän bergä xalıqara problemalar ,Kuril’ utrawlarınıñ kiläçäge häm başqa mäs’älälär xaqında söyläşte. Söyläşülärdän soñ mädäniyat,mäğarif,tışqı êşlär ,iqtisad, iminlek, ênergetika häm başqa tarmaqlarda 68 kileşü imzalandı. Annan soñ ike il liderı jurnalistlarnıñ sorawlarına cawap birde.

Putinnıñ säfärennän soñ ike il arasında tuñdırılğan xärbi mönäsäbätlärne häm 2+2 formatındağı oçraşularnı qabat başlatu mäs’äläsendä kileşü tä’min itelde. Tağın ber möhim mäs’älä isä Rusiya “Gazprom” şirkäteneñ “Mitsui” häm “Mitsubishi” belän kileşülär imzalawı ide. “Gazprom” şulay uq Yaponiya xalıqara xezmättäşlek bankı belän dä xezmättäşlek kileşüe imzaladı. Rusiya Federaśiyäse däwlät başlığı Vladimir Putin belän Yaponiya prem’yer-ministrı Şinzo Abe ike il arasında atom-töş ênergiyäse tarmağında tınıç maqsatlı xezmättäşlek xaqındağı memorandumğa qul quydı. Älege kileşülär ike ilneñ üzara mönäsäbätlärne tağın da yuğarı däräcägä kütäregä teläwlären kürsätä.

Putinnıñ Yaponiya säfäre qısasında ike il liderı Tokioda Yaponiya - Rusiya Êş forumında qatnaştı. Vladimir Putin Yaponiya prem’yer-ministrı Abe belän bergä Xalıqara Kukodan dzyudo institutına da bardı.

       Putinnıñ 11 yıldan soñ Yaponiyağa yasağan säfäre ike il mönäsäbätlären kamilläşterü cähätennän bik uñışlı uzdı dip äytergä mömkin. Yaponiya könbatış belän bergä Rusiyägä sankśiyälär kertü urınına yomşaq köçen qullanıp Rusiya belän mönäsäbätlärne üsterü häm Kuril’ utrawları problemasın çişärgä teläwen Putinnıñ säfärendä tağın ber tapqır kürsätte.

Yaponiyanıñ ike il arasındağı iñ zur problema bulğan Kuril’ utrawları mäs’äläsen çişärgä niyätle buluı belenä. Ağımdağı yılnıñ 7 nçe mayında ike lider Soçida Kuril’ utrawları probleması xaqında söyläşep prem’yer-ministr Abeneñ 8 maddädän torğan çişeleş planın qaradı. Kreml’ süzçese Dmitriy Peskov bu oçraşuda Kuril’ utrawları problemasınıñ konstruktiv bäyläneştä qaraluın belderep, bu yünäleştäge söyläşülärneñ tışqı êşlär ministrları däräcäsendä däwam itäçägen beldergän ide. Noyabr’ aynda Rusiyäneñ Kuril’ utrawlarınnan İturup häm Kunaşirğa yar buyı saqlanu raketa sistemaları urnaştıruı turında xäbärlär çıqqan ide.

Vladimir Putinnıñ Yaponiya säfärendä yaqlar Kuril’ utrawlarında yäşäwçe watandaşlarnıñ çik buyınnan uzu prośeduraların ciñeläytü xaqında kileşte.Tokioda imzalanğan kileşülärgä qarap Yaponiyanıñ Rusiyäneñ könçığışına kapital salu belän üz köçen arttırırğa teläwen, Abeneñ may ayında açıqlağan 8 maddälek çişeleş planı êçtälegeneñ Rusiyäneñ könçığışına kapital salu buluın äytergä mömkin. Bu isä ike il öçen dä faydalı bulır.