Futboll – Barcelona shkarkon trajnerin Ernesto Valverde, e zëvendëson me Quique Setien

Barcelona ka shkarkuar trajnerin Ernesto Valverden për ta zëvendësuar atë me Quique Setien, një përpjekje kjo për t'i dhënë një tjetër kuptim këtij sezoni.

Futboll – Barcelona shkarkon trajnerin Ernesto Valverde, e zëvendëson me Quique Setien

Eliminimi në gjysmëfinalen e Superkupës së Spanjës ndaj Atletico Madridit (3-2), por edhe rezultatet e fundit në kampionat, e kanë detyruar presidentin Josep Maria Bartomeu të shkëpusë marrëdhëniet me Ernesto Valverden.

Në orët e vona të mbrëmjes së të hënës, Barcelona bëri të ditur me një komunikatë në faqen zyrtare shkarkimin e 55-vjeçarit, të cilin e falënderon për punën e bërë dhe i uron suksese në të ardhmen.

Ernesto Valverde u ul në stolin e Barcelonës pas largimit të Luis Enriques në verën e vitit 2017 dhe në këto 2 vite e gjysmë arriti të fitonte 2 tituj kampion në Spanjë (2017-2018 dhe 2018-2019), 1 Kupë Mbreti (2017-2018) dhe 1 Superkupë të Spanjës (2018); ndërkohë që në Ligën e Kampioneve s u eliminua në mënyrë të turpshme me përmbysje një herë nga Roma dhe një herë nga Liverpooli.

Në fund të javës 19-të të kampionatit spanjoll, Barcelona kryeson përpara Real Madridit me diferencë golash.

Valverde është trajneri i katërt që shkarkohet teksa skuadra e tij kryeson kampionatin, në historinë e La Ligas.

Pasi u refuzua nga emra si Ronald Koeman dhe Xavi Hernandez, Barcelona ka gjetur menjëherë pasuesin e Valverdes dhe ai është Quique Setien.

Ish-trajneri 61-vjeçar i Lugos (2009-2015), Las Palmasit (2015-2017) dhe Real Betisit (2017-2018) ka firmosur për 2 vite e gjysmë deri më 30 qershor 2022.



Lajme të ngjashme