Vizita e Presidentit Erdogan në Vatikan

Presidenti turk Rexhep Tajip Erdoan (Recep Tayyip Erdoğan) ndodhet në një vizitë zyrtare në Vatikan. Fillimisht Presidenti Erdoan dhe bashkëshortja e tij, Emine Erdoan, u pritën nga Prefekti i Shtëpisë Papnore, Kryepeshkopi Georg Gaenswein në Portën e San Damasos.

Kurse Papa Françesku e priti presidentin Erdoan në hyrje të Sallës së Bibliotekës në Pallatin Apostolik, ku lideri i botës katolike pret mysafirët.

"Ju faleminderit për kujdesin", është shprehur presidenti Erdoan, ndërkohë që edhe Papa e ka falënderuar presidentin turk për vizitën.

Presidenti Erdoan dhe Papa Françesku shtrënguan duart para përfaqësuesve të mediave, dhe më pas kaluan në Sallën e Bibliotekës për të mbajtur takimin kokë më kokë, i cili u zhvillua me dyer të mbyllura për gazetarët. Në këtë vizitë Presidenti Erdoan shoqërohet nga bashkëshortja e tij, Emine Erdoan dhe nga Ministri i Energjisë dhe Burimeve Natyrore, Berat Albajrak me bashkëshorten e tij.