Gjermani – Dua Lipa merr Bambin e Artë në Berlin

Në Berlin u ndanë sërish çmimet Bambi, njërin prej tyre e mori këngëtarja britanike me prejardhje nga Kosova, Dua Lipa...

1090190
Gjermani – Dua Lipa merr Bambin e Artë në Berlin

Në Berlin u ndanë sërish çmimet Bambi, njërin prej tyre e mori këngëtarja britanike me prejardhje nga Kosova, Dua Lipa.

Organizatorët e Bambit e quajnë këtë të fundit çmimin më të rëndësishëm mediatik të Gjermanisë. Me këtë nuk janë dakord të gjithë. Por një gjë nuk mund t’i mohohet Bambit: Ai këtë vit mbushi 70 vjeç. Që është çmimi që jepet me më shumë pompozitet e që i bën edhe më skeptikët të rrinë tre orë ulur para televizorit. Dhe siç konstatonte "Der Spiegel Online": “Joshja ka të bëjë me kureshtjen, se cilin njeh nga ata që thirren të dalin para kamerës në atë moment”.

Dua Lipa, këngëtarja britanike me prejardhje nga Kosova, e mori kaprollin e artë në kategorinë Muzikë Ndërkombëtare: me komentin: Sa i bukur! Dhe i ofroi publikut një performancë me një potpuri nga tre këngët e saj më të famshme: “Be the one”, “New Rules” dhe “IDGAF”.

Dua Lipa, e cila u thirr para kamerës si “princesha e popit”, ishte një nga pikat kulmore të eventit. Për ta prezantuar, regjia kishte marrë disa pjesë nga intervista që ajo kishte dhënë për "ZDF" me gazetaren dhe shkrimtaren gjermane me prejardhje gjithashtu nga Kosova, Arta Ramadani. Një vit më parë në Bambi 2017 kishte kënduar këngëtarja tjetër britanike me origjinë shqiptare, Rita Ora. Bambin e saj në kategorinë “Muzikë Ndërkombëtare” ajo e kishte marrë qysh në vitin 2015.

Fytyrë tjetër e njohur e Bambit të sivjetshëm ishte Sophia Loren. Aktorja e famshme italiane, që edhe në moshën 84-vjeçare mbetet një kënaqësi pamore, kishte ardhur të fliste me moderatorin e famshëm gjerman, Thomas Gottschalk, për 70-vjetorin e çmimeve Bambi, dhjetë prej të cilave i kishte marrë vetë ajo.

Ndërsa çmimi i sivjetshëm për aktoren ndërkombëtare i shkoi aktores spanjolle, Penelope Cruz, laureate e Oskarit. Një figurë e njohur që pritej ishte këngëtari britanik Rod Stewart. Ai qe ftuar të merrte çmimin e nderit, “Legjenda e Muzikës”, por kishte pësuar një lëndim në këmbë teksa luante futboll, siç raportoi vetë 73-vjeçari Stewart në një mesazh me video përmes “Facebook”.

Sipas organizatorëve, Bambi nderon në radhë të parë njerëz me vizione dhe kreativitet, suksesi i të cilëve është pasqyruar në media gjatë vitit. Bambi jepet për fusha të ndryshme të shoqërisë, ndër to edhe në kategorinë “Stille Helden” (Heronj të heshtur) për organizata dhe njerëz që angazhohen në të mirë të shoqërisë. Sivjet Bambi i kësaj kategorie iu dha shoqatës nga Kasseli, “Intensiv Leben”, e cila merret me familjet e fëmijëve që kanë nevojë për përkujdesje intensive dhe frymëmarrje artificiale.



Lajme të ngjashme