Ekonomia turke u rrit me 6,7% në tremujorin e tretë

Ekonomia turke regjistroi një normë rritjeje prej 6,7% në tremujorin e tretë të vitit 2020 pavarësisht pandemisë së koronavirusit, sipas të dhënave të publikuara të hënën nga Instituti Turk i Statistikave (TurkStat).

1536770
Ekonomia turke u rrit me 6,7% në tremujorin e tretë

Instituti i Statistikave të Turqisë (TurkStat) publikoi të hënën (30.11.2020) shifrat e Prodhimit të Brendshëm Bruto (PBB) për tremujorin e tretë të vitit (periudhën korrik-shtator).

PBB në tremujorin e tretë të vitit është rritur me 6,7% krahasuar me të njëjtën periudhë të vitit të mëparshëm, pavarësisht ndikimeve të pandemisë së koronavirusit të llojit të ri (Covid-19).

Prodhimi i Brendshëm Bruto i vendit (PBB) me çmimet aktuale në periudhën korrik-shtator është llogaritur në 1,4 trilionë lira turke (197,4 miliardë dollarë), tha TurkStat.

Kjo shifër është shumë më e lartë se pritjet e tregut, pasi një panel prej 17 ekonomistësh të anketuar nga Anadolu Agency (AA) kishin vlerësuar të enjten se ekonomia turke do të zgjerohej me 5% në të njëjtën periudhë.

Ata parashikuan gjithashtu që PBB vjetore e Turqisë në 2020 do të rritet me 0,3% mesatarisht, por shifra befasuese ka të ngjarë të rrisë parashikimet për në fund të vitit.

Programi i ri aktual ekonomik në fuqi gjithashtu parashikon që ekonomia turke të rritet 0,3% këtë vit. Ekonomia parashikohet të zgjerohet me 5,8% në 2021, pasi do të vihen në lëvizje konsumi dhe investimet e shtyra dhe të ardhurat nga turizmi të normalizohen.

Objektivi i programit ekonomik është një PBB me vlerë 702 miliardë dollarë për vitin 2020 dhe 735 miliardë dollarë për vitin e ardhshëm.

PBB-ja e vendit u zgjerua me 4,5% në tremujorin e parë të vitit 2020 dhe u tkurr me 9,9% në të dytin për shkak të efekteve të pandemisë në ekonomi.

Krahasuar me tremujorin e mëparshëm, PBB-ja e korrigjuar nga ndikimet sezonale dhe kalendarike në periudhën korrik-shtator u rrit me 15,6%, referuar të dhënave të TurkStat.

Po ta analizojmë PBB në bazë të aktiviteteve që e përbëjnë atë, në tremujorin e tretë aktivitetet financiare dhe të sigurimeve u rritën me 41,1% në krahasim me të njëjtën periudhë të vitit të mëparshëm.

Gjithashtu shifrat janë rritur me 15% në sektorin e informacionit dhe komunikimit, me 8% në industri, 6,4% në ndërtim, 6,2% në bujqësi, 6% në shërbimet e tjera, 2,8% në pasuritë e patundshme, 2,4% në aktivitetet e shërbimeve publike si: menaxhimi publik, arsimi, shëndeti i njeriut dhe shërbimet e tjera sociale.

Vlera e shtuar e sektorit të shërbimeve - tregtia me shumicë dhe pakicë, transporti, magazinimi, akomodimi dhe aktivitetet e shërbimit të ushqimit - u rritën me 0,8% në bazë vjetore, pasi ky sektor u godit më rëndë nga pandemia e re e koronavirusit.

Ministri i Industrisë dhe Teknologjisë, Mustafa Varank në vlerësimin që u ka bërë shifrave të Prodhimit të Brendshëm Bruto (PBB) për tremujorin e tretë të vitit në profilin e tij në «Twitter» ka thënë se Turqia ka një infrastrukturë të fortë prodhimi.

“Me ndikimin e prodhimit dhe kërkesës së shtyrë pas pandemisë arritëm që në tremujorin e tretë të regjistrojmë një rritje prej 6,7%. Vazhdojmë të planifikojmë periudhën në vijim në varësi të ecurisë së pandemisë. Objektivi është të vazhdojmë me një rritje të shëndoshë dhe të qëndrueshme”, shkruan ministri Varank në «Twitter».



Lajme të ngjashme