Qiproja turke: Ishulli nuk ka nevojë më për paqeruajtësit e armatosur

Zëvendëskryeministri dhe ministri i Punëve të Jashtme të Republikës Turke të Qipros së Veriut (RTQV), Kudret Ozersay, ka bërë thirrje për kthimin e misionit paqeruajtës të OKB-së në ishull në një mision civil.

Qiproja turke: Ishulli nuk ka nevojë më për paqeruajtësit e armatosur

Në një intervistë me agjencinë e lajmeve AA (Anadolu Aency), Kudret Ozersay, i cili zhvilloi takime me zyrtarë të OKB-së dhe diplomatë në ShBA, tha se misioni ushtarak nuk ishte më i nevojshëm, duke shtuar se "rrethanat në ndryshim" kërkonin një rishikim të forcave aktuale paqeruajtëse në ishullin lindor të Mesdheut.

Ozersay udhëtoi në Nju-Jork më 7 janar për të shprehur pikëpamjet e Qipros turke tek OKB dhe anëtarët e Këshillit të Sigurimit, ku çështja pritet të diskutohet deri në fund të janarit.

Duke nënvizuar se prania e rreth 800 forcave të OKB-së në ishull ishte e kushtueshme, ministri turkoqipriot theksoi se roli i misionit si një pengesë kundër konfrontimit të armatosur mund të arrihej me një mision civil dhe me gjysmën e kostos aktuale.

"Ne besojmë se nuk ka nevojë për një mision [ushtarak] që kushton rreth 22-23 milionë dollarë në një vit," tha ai, duke shtuar se për praninë e OKB-së në ishull në 2019  pritet të shpenzohen 54 milionë dollarë.

Ministri tha se në OKB ka një mendim të përgjithshëm se funksionet, fuqitë dhe numri i trupave paqeruajtëse të OKB-së në ishull duhet të rishikohen, edhe nëse mandati i tyre zgjatet në shkurt.

Shpimet në Mesdheun Lindor

Duke folur për mosmarrëveshjen aktuale për nxjerrjen e hidrokarbureve në Mesdheun Lindor, Ozersay vuri në dukje se çështja mund të shërbejë si një mundësi për dialog mes të dy palëve.

Ai nënvizoi se në mungesë të marrëveshjes dypalëshe mbi të drejtat e shpimit, kompanitë mund të humbnin burimet dhe kohën, dhe tensionet mund të përshkallëzoheshin në rajon.

Turqia vazhdimisht ka kundërshtuar shpimet e njëanshme të administratës grekoqipriote në Mesdheun Lindor, duke u thënë se qipriotët turq gjithashtu kanë të drejta për burimet në këtë zonë.

Bashkëpunimi dypalësh mbi federatën

Duke sugjeruar se një partneritet i bazuar në bashkëpunim mund të jetë më i realizueshëm në mes të veriut dhe jugut të ishullit, Ozersay tha se hezitimi i grekëve qipriotë për të ndarë pushtetin dhe pasurinë e ka bërë "të pamundur" një model federal

"Nëse nuk doni të ndani qeverisjen dhe pasurinë, nuk mund të bëni një partneritet federal", tha ai, duke shtuar se bashkëpunimi në energji dhe lufta kundër terrorizmit dhe krimit të organizuar mund të çojë në ndërvarësinë ndërmjet dy palëve dhe "përfundimisht mund të çojë në një zgjidhje gjithëpërfshirëse të mosmarrëveshjeve”.

 


Lajme të ngjashme