Gjermani - Ekspertët: Sjelljet raciste, dhunim i demokracisë

Nxitjet e fundit të urrejtjes ndaj refugjatëve në Gjermani kanë shkaktuar dhunë, vështirësi dhe ankth.Prof. dr. Wolfang Frindte nga Universiteti i Jenës e quan dhunën sulm kundër demokracisë.

Gjermani - Ekspertët: Sjelljet raciste, dhunim i demokracisë

Pas akteve dramatike të dhunës në shtëpitë e refugjatëve në Gjermani, prof. dr. Wolfgang Frindte nga Universiteti i Jenës, ekspert në ekstremizmin e krahut të djathtë, i ka bërë thirrje policisë dhe autoriteteve të drejtësisë të dënojnë ashpër autorët e sulmeve të tilla.

Wolfgang Frindte është psikolog social dhe komunikimi në Universitetin e Jenës, ku jep mësim dhe studion ekstremizmin e krahut të djathtë.

Së fundmi, ai ka publikuar një përmbledhje me ese të titulluar “Ekstremizmi i krahut të djathtë dhe Organizata e Fshehtë Socialiste Kombëtare”.

“Po përjetojmë një sulm në demokraci”, u shpreh ai në një intervistë për agjencinë gjermane të lajmeve, DPA.

DPA: Debati rreth emigrimit po del jashtë kontrollit. Kemi parë kërcënime me bombë dhe me vrasje, shtëpi që u është vënë flaka dhe refugjatë që janë bërë objekt fyerjesh. Çfarë po ndodh?

Frindte: Të njëjtën pyetje ia bëj vetes dhe përgjigjja është shumë shqetësuese. Ajo çka dinim 20 vite më parë tashmë po del sheshit, ekstremizmi i krahut të djathtë nuk është një fenomen i vogël. Ai ndikon gjerësisht në popullsi. Ekstremistët dhe populistët e krahut të djathtë po rindërtojnë vetveten. Që prej “Pegida”-s (lëvizja islamofobike që filloi të përhapej në Gjermani vitin e kaluar), njerëzit kanë treguar urrejtje në rrugë dhe faqet e internetit. E drejta radikale e së djeshmes po fiton mbështetje ditët e sotme. Kjo do të thotë se ekstremizmi i krahut të djathtë nuk është problem që prek vetëm të rinjtë. Ai është shtrirë në të gjitha moshat dhe nivelet e arsimimit. Aktualisht po përjetojmë një sulm ndaj demokracisë.

DPA: Pra, a do të thotë kjo se Pegida dhe simotra të saj kanë bërë që racizmi të pranohet nga shoqëria?

Frindte: Racizmi dhe ekstremizmi i djathtë janë pranuar nga shoqëria që më parë, siç kanë treguar studimet. Pegida e përhapi me sukses këtë ide ​​për t’u pranuar. Njerëzit nuk përmbahen kur bërtasin në mënyrë agresive përballë kamerave dhe duke shprehur urrejtjen e tyre ndaj refugjatëve. Komentet që shpreheshin në lokale tani brohoriten në sheshe.

DPA: Sa ekstremistë të djathtë ka në Gjermani?

Frindte: Numri është rritur në rreth 15 për qind, siç kanë treguar në mënyrë të përsëritur studimet. Në qoftë se ju merrni gjithashtu parasysh njerëzit që mbështesin dhunën ndaj refugjatëve duke mos marrë pjesë aktive në të, kjo shifër është më e lartë se 30 për qind. Në fund të fundit, studimet e mëparshme anonime nuk na tregojnë më shumë. Nëse ju shikoni në faqet e internetit, postimet në Facebook dhe blogje, ka prova të mjaftueshme se këta njerëz nuk janë vetëm radikalët e djathtë tradicionale që ju njihni. Ne gjithashtu duhet të përfshijmë racistët e përditshëm që e pranojnë këtë dhunë.

DPA: Kancelarja Angela Merkel më në fund vendosi të vizitojë Heidenau në Saksoni, vendi ku ndodhën trazirat kundër emigrantë, javën e kaluar. Çfarë kontributi kanë këto vizita të shkurtra në gjendjen e tensionuar?

Frindte: Tregojnë mbrojtje dhe mbështetje për refugjatët dhe ndihmësit e tyre. Këto vizita nuk janë pritur mire nga ekstremistët e krahut të djathtë, siç është shfaqur edhe në television. Por atëherë unë pyes veten, pse jemi kaq tolerantë ndaj jotolerancës?

DPA: Çfarë duhet të ndodhë sipas pikëpamjes tuaj për t’u mbrojtur kundër këtij sulmi ndaj demokracisë?

Frindte: Demokracia ka nevojë të vendosë mbrojtjen e saj. Nga njëra anë, ne jemi duke humbur një kryengritje të orkestruar të njerëzve të mirë. Nga ana tjetër, kjo është një punë për sistemin e policisë dhe të drejtësisë. Kancelarja e Gjermanisë u sulmua verbalisht gjatë vizitës së saj në Saksoni nga demonstruesit duke e akuzuar atë për tradhti ndaj atdheut. Nëse unë do të akuzoja për gjëra të tilla fqinjin tim nga ana tjetër e gardhit të kopshtit, ai do të kishte të drejtë të më padisë për shpifje. Pse nuk ndodh kjo menjëherë në këtë rast? Ne nuk kemi nevojë për dënime më të ashpra apo ligje të reja. Policia dhe gjykatat duhet vetëm të zbatojnë më fort masat ekzistuese në mënyrë që të shmangen krimet e urrejtjes. Ka të bëjë me lirinë tonë dhe me ata që kanë ardhur tek ne për mbrojtje.

 

Nga Andreas Hummel


Fjalët Kyçe:

Lajme të ngjashme