Inagurohet Spitali Rajonal Memorial i Fierit, i ndërtuar dhe financuar nga qeveria turke

Rama në hapjen e spitalit në Fier: "Jemi me fat që kemi Turqinë mike dhe të gatshme për të ndarë dijen e vet"

1626100
Inagurohet Spitali Rajonal Memorial i Fierit, i ndërtuar dhe financuar nga qeveria turke
Türkiye-Arnavutluk Fier Dostluk Hastanesi_7.jpg
Türkiye-Arnavutluk Fier Dostluk Hastanesi_9.jpg
Türkiye-Arnavutluk Fier Dostluk Hastanesi_2.jpg
Türkiye-Arnavutluk Fier Dostluk Hastanesi_5.jpg
Türkiye-Arnavutluk Fier Dostluk Hastanesi_4.jpg
Türkiye-Arnavutluk Fier Dostluk Hastanesi_10.jpg
Türkiye-Arnavutluk Fier Dostluk Hastanesi_8.jpg
Arnavutluk_Türkiye-den gönderilen Sinovac aşıları_7.jpg
Arnavutluk_Türkiye-den gönderilen Sinovac aşıları_5.jpg
Arnavutluk_Kukes Havalimanı_3.jpg
Tiran_cami bıçakla saldırı_1.jpg

Agjenda shqiptare – Zhvillimet kryesore të javës (16/2021)

-Inagurohet Spitali Rajonal Memorial i Fierit, i ndërtuar dhe financuar nga qeveria turke

Spitali i Miqësisë Turqi-Shqipëri Fier, për të cilën premtoi Presidenti i Turqisë, Recep Tayyip Erdoğan, gjatë vizitës së kryeministrit të Shqipërisë Edi Rama në Turqi më 6 janar 2021, u hapë të mërkurën me anë të një ceremonie.

Në ceremoninë e inaugurimit mori pjesë edhe presidenti Erdoğan me anë të video-konferencës, ndërsa të pranishëm ishin ministri turk i Shëndetësisë, Fahrettin Koca, kryeministri Edi Rama dhe ministrja e Shëndetësisë dhe Mbrojtjes Sociale, Ogerta Manastirliu.

Kantieri i spitalit ishte hapur më 22 janar, ndërsa Rama kishte theksuar se me tre turne do të angazhohen 1.200 forca pune.

Sipas marrëveshjes e cila është nënshkruar më 02 shkurt të vitit 2021 nga zv/ministri turk i Shëndetësisë, Halil Eldemir dhe ambasadori i Shqipërisë në Ankara, Kastriot Robo, Turqia merr përsipër t'i dhurojë Shqipërisë një spital me 150 shtretër që u ndërtua në Fier dhe pajisjet mjekësore, materialet dhe orenditë për t'u përdorur në këtë spital.

Sipas marrëveshjes, ky financim prej 70 milonë euro jepet nga pala turke në mënyrë që të forcojë sistemin shëndetësor shqiptar dhe të mbështesë infrastrukturën e kujdesit shëndetësor. Në këtë kontekst, Turqia do të caktojë personelin e kujdesit shëndetësor në Shqipëri gjatë fazës së tranzicionit të spitalit rajonal të Fierit dhe do të ofrojë këshillim përmes Ministrisë së Shëndetësisë.

Rama në hapjen e spitalit në Fier tha se: "Jemi me fat që kemi Turqinë mike dhe të gatshme për të ndarë dijen e vet".

 “Jemi me fat që kemi një vend kaq mik dhe kaq të gatshëm për të ndarë me ne dijen e vet. Ky spital nuk është fundi por fillimi i një pune të përbashkët që do ta kthejë shëndetësinë shqiptare në një histori suksesi njësoj si shëndetësinë turke. Në takimin historik të Ankarasë ne kemi nënshkruar disa marrëveshje, dhe se ka filluar puna për marrëveshjen për bashkëpunim dhe zhvillim në fushën e turizmit dhe trashëgimisë kulturore. Skuadrat tona po punojnë për një ndërhyrje masive në Berat dhe Gjirokastër. Po ashtu po punohet për një investim i cili do të sjellë ekselencën e turizmit në të gjithë bregdetin e Divjakës duke ruajtur harmoninë me natyrën dhe duke e bërë Divjakën një destinacion të klasit të parë, në rrugën për ta bërë Shqipërinë kampione të turizmit në Ballkan. Së bashku me Presidentin jemi marrë vesh për një hop të ri zhvillimor në fushën e investimeve që sjellin punësim më cilësor duke sjellë këtu ekselencën e industrisë dhe duke ndërtuar fabrika të fjalës së fundit ku të punësohen të rinj e të reja. Dhe qershia mbi tortë është hapja në Shqipëri e filialit të Universitetit Teknik të Stambollit, një prej universiteteve më të mirë në botë.”- u shpreh Rama.

***

-Në Shqipëri, mbërrijnë nga Turqia 208 mijë vaksina të tjera Sinovac

Në aeroportin ndërkombëtar “Nënë Tereza” mbërritën të hënën 208 mijë vaksina të “Sinovac”.

Ministrja e Shëndetësisë dhe Mbrojtjes Sociale, Ogerta Manastirliu dhe ministri i Shtetit për Rindërtimin, Arben Ahmetaj ishin të pranishëm në aeroportin “Nënë Tereza” ku deklaruan se deri tani janë më shumë se 700 mijë vaksina që kanë mbërritur në Shqipëri.

“...208 mijë vaksina sapo kanë mbërritur në aeroportin e Rinasit, pjesë e kontratës së qeverisë shqiptare me distributorin e autorizuar të vaksinës ‘Coronavac’, ‘Sinovac’. Tashmë kemi përfunduar gjithë lëvrimin e kësaj kontrate, duke siguruar në total për këtë kontratë 500 mijë doza vaksine dhe në tërësi sot në Shqipëri, nga moment i parë i fillimit të procesit të lëvrimit të vaksinave të kontraktuara nga qeveria shqiptare, kemi më shumë se 700 mijë vaksina që kanë mbërritur në territorin e Shqipërisë. Aktualisht,  po ecet me ritme shumë të larta të vaksinimit dhe jemi të vendosur të vijojmë me intensitet kudo në Shqipëri, qoftë sa i përket grupmoshës +60 vjeç dhe mbi të gjitha të vaksinimi të sëmurëve kronikë, por edhe me grupet e riskura...”.

Përmendim se vaksinimi masiv po vijon me kalendar të kombinuar, për personat mbi 60 vjeç dhe punonjës të shërbimeve kritike. Që prej fillimit të vaksinimit janë kryer deri tani mbi 350,000 si dhe procesi i vaksinimit po kryhet sipas të gjithë parametrave të sigurisë dhe cilësisë nga ekipe të trajnuar vaksinatorësh në të gjithë territorin shqiptar.

***

-Shqipëria mbështet vendimin për tërheqjen e trupave nga Afganistani 

Ministrja për Evropën dhe Punët e Jashtme, Olta Xhaçka, dhe ministri i Mbrojtjes, Niko Peleshi morën pjesë në një takim pune të ministrave të Punëve të Jashtme dhe atyre të Mbrojtjes të vendeve të NATO-s, me Sekretarin e Shtetit dhe Sekretarin e Mbrojtjes të SHBA-ve, ku në fokus ishin zhvillimet e kohëve të fundit në Afganistan dhe vijimësia e misionit të NATO-s “Resolute Support”.

Ministrja Xhaçka vlerësoi vendimin e administratës aktuale të SHBA, për të mos u tërhequr në mënyrë të njëanshme nga Afganistani, por duke e bërë këtë në konsultim të plotë me vendet e NATO-s.

Shqipëria mbështet plotësisht vendimin e propozuar nga miqtë amerikanë dhe është e gatshme të tërheqë të gjithë trupat e saj nga Afganistani, në përputhje me afatin kohor të vendosur nga NATO. Në këtë botë të mbushur plot kërcënime, ne nuk mund të përballemi dot vetëm dhe besoj se nga ky moment, Aleanca, do të dalë më e fortë dhe më e bashkuar, me më shumë synime, energji dhe ide, për të garantuar sigurinë tonë kolektive”, u shpreh ajo.

Kryediplomatja Xhaçka dhe ministri Peleshi vlerësuan që ky proces politik i negociatave të paqes në Afganistan të prodhojë një zgjidhje të negociuar, e cila të sjellë paqe të qëndrueshme dhe respektim të plotë të të drejtave të njeriut për popullin e Afganistanit.

Peleshi ndërkaq, duke njoftuar vendimin e marrë shprehu krenarinë për mbështetjen e pakursyer politike dhe ushtarake të Shqipërisë prej vitit 2002 në përpjekjet e përbashkëta në Afganistan.

“Krenar për kontributin dhe sakrificat e FARSH . Sot është dita për të kujtuar dëshmorin e atdheut kapiten Feti Vogli”, u shpreh Peleshi.

***

-Përurohet  Aeroporti Ndërkombëtar i Kukësit “Zayed – Flatrat e Veriut”

“Lasgushi” i Air Albania u ul të dielën në Aeroportin Ndërkombëtar të Kukësit “Zayed – Flatrat e Veriut”, duke shënuar fluturimin e parë zyrtar drejt këtij aeroporti.

Ashtu siç kishte premtuar kohë më parë kryeministri Edi Rama, të parët që prekën pistën e Aeroportit të Kukësit ishin emigrantët kuksianë që jetojnë në Londër, madje siç ka thënë shpesh kreu i qeverisë, prioritet për të fluturuar falas do të kishin veçanërisht skeptikët e këtij projekti.

Bashkë me ta, kryeministri Rama zgjodhi të ishte vetë në bordin e avionit të nisur nga Rinasi, në respekt të rregullave ndërkombëtare të fluturimeve.

Aeroporti i Kukësit është ndërtuar dhe studiuar mbi bazën e konceptit për t’i shërbyer trevave shqiptare, si të Shqipërisë, Kosovës, por edhe Maqedonisë së Veriut dhe Malit të Zi.

Aeroporti i Kukësit do të jetë i dedikuar për kompanitë low cost, që ofrojnë shërbime cilësore me çmime të ulëta.

Të punësuarit në këtë aeroport do të jenë nga zonat rreth Kukësit, përveç atyre pozicioneve që kërkojnë trajnime apo licencime të specializuara.

Aeroporti i Kukësit ka një territor prej 512 mijë metra katrorë, me një gjatësi piste prej 1900 metrash dhe gjerësi 45 metra. Kategoria e tij është 3C, për akomodimin e avionëve turboprop dhe avionëve me turbina rajonalë. Kapaciteti i projektuar është rreth 1 milion pasagjerë në vit.

***

-Diyaneti i Turqisë me rastin e muajit të Ramazanit ndihmon familjet në nevojë në Shqipëri

Zyra e Këshilltarit të Çështjeve Fetare pranë Ambasadës së Turqisë në Tiranë me kontributin e Fondacionit të Kryesisë së Çështjeve Fetare të Turqisë -TDV, ka shpërndarë ndihma për familjet në nevojë në Tiranë me rastin muajit të Ramazanit.

Në aktivitetin e shpërndarjes së ndihmave organizuar në ambientet e Shkollës 9-vjeçare "Avni Rustemi" në Tiranë ishin të pranishëm ambasadori i Turqisë në Tiranë, Murat Ahmet Yörük, bashkëshortja e ambasadorit turk, Ayşegül Erdal Yörük, zyrtarë të tjerë të ambasadës dhe përfaqësues të Shoqatës Kombëtare të Prindërve për Kujdesin e Fëmijëve me Aftësi të Kufizuara të Shqipërisë.

Në fjalën përshëndetëse të mbajtur gjatë aktivitetit të shpërndarjes së ndihmave, ambasadori Yörük, përcolli urimet e tij që muaji i Ramazanit të sjellë mirësi dhe mbarësi.

Duke iu drejtuar të pranishmeve, ambasadori Yörük tha se "Ju kam sjellë gjithashtu përshëndetje nga Presidenti i Republikës së Turqisë, Recep Tayyip Erdoğan".

Këshilltari për Çështjet Fetare pranë Ambasadës së Turqisë në Tiranë, Bekir Yanılmaz, tha se përsëri në këtë Ramazan jemi bashkë me njerëzit në nevojë.

Kryetari i Shoqatës Kombëtare të Prindërve për Kujdesin e Fëmijëve me Aftësi të Kufizuara të Shqipërisë, Shefqet Taku, në fjalën e tij falënderoj institucionet turke për mbështetjen e ofruar ndaj Shqipërisë.

"...Falënderoj Ambasadën turke në Tiranë, zyrën fetare, qeverinë turke, parlamentin turk, vëllezërit dhe motrat tona myslimane turke që jemi të pandarë me njëri-tjetrin. Allahu e shpërbleftë shpirtin e tyre të pastër mysliman për gjithë botën që ata e kanë trajtuar myslimanizmin dhe gjithë popullin pa dallim feje dhe krahine”, tha Taku.

Duke folur për mbështetjen e ambasadorit turk për Shqipërinë dhe shqiptarët, Taku theksoi më tej se "Falënderoj ambasadorin Murat Ahmet Yörük, i cili kur ka marrë detyrën e re në Shqipëri ai në mbledhjen që u prezantua me popullin shqiptar tha se ‘dera e ambasadës është e hapur për të gjithë shqiptarët pa dallim feje, krahine edhe ideje’. Pra do të thotë se jemi një popull, jemi një familje me Turqinë...".

Ndihmat që përfshijnë pako me produkte ushqimore u shpërndanë për 100 familje në nevojë dhe familje të tjera që kanë fëmijë me aftësi të kufizuara, kryesisht të mbështetura nga Shoqata Kombëtare e Prindërve për Kujdesin e Fëmijëve me Aftësi të Kufizuara të Shqipërisë.

Ndihmat me mbështetjen nga Fondacioni i Kryesisë së Çështjeve Fetare të Turqisë do të vazhdojnë të ndahen në Shqipëri edhe për qindra familja të tjera gjatë muajit të bekuar të Ramazanit.

***

-Plagosi 5 persona te xhamia “Dine Hoxha”, policia arreston 34-vjeçarin 

Një ngjarje e rëndë ka ndodhur të hënën në xhaminë “Dine Hoxha” në Rrugën e Kavajës në Tiranë.

Policia e Tiranës bëri të ditur se “rreth orës 14:30, në Rrugën e Kavajës, një shtetas është futur në ambientet e një kulti fetar (xhami) dhe në rrethana ende të paqarta ka plagosur me mjet prerës 5 shtetas”.

“...Falë reagimit profesional dhe të menjëhershëm të shërbimeve të Policisë është bërë i mundur neutralizimi dhe prangosja e autorit të dyshuar, shtetasi Rudolf Nikolli 34 vjeç, nga Burreli, i cili po shoqërohet në ambientet e Drejtorisë Vendore të Policisë Tiranë, për veprime të mëtejshme. Ndërkohë, shërbimet e Policisë iu kanë dhënë ndihmën e parë shtetasve të lënduar, të cilët janë transportuar në spital, për ndihmë mjekësore dhe ndodhen jashtë rrezikut për jetën”, thuhet në deklaratën zyrtare të Policisë.

Policia sqaron se në vendngjarje ka mbërritur grupi hetimor dhe nën drejtimin e Prokurorisë vijon puna për sqarimin e rrethanave dhe dokumentimin e plotë ligjor të ngjarjes.

Imami i xhamisë “Dine Hoxha”, Ahmed Kalaja ka dënuar me forcë ngjarjen e rëndë, e cila shkaktoi frikë tek besimtarët.

Sot pas dreke, nga ora 14:00, ka ndodhur një akt barbarie pranë xhamisë “Dine Hoxha” ku një njeri i armatosur me thikë godet me thikë besimtarët brenda xhamisë, por nuk mjaftohet me goditjen e besimtareve brenda xhamisë, por godet edhe njerëzit që ishin në rrugë. Personi është arrestuar”, tha ai.

Imami shprehet se situata është e qetë dhe nuk ka vend për t’u shqetësuar.

Situata është nën kontroll dhe nuk ka asgjë për t’u shqetësuar dhe lus Zotin e madh që të shërojë njerëzit tanë që janë plagosur. Shpresoj që mos të ketë qenë ndonjë akt terrorist, por shpresojmë që të ketë qenë njëri me të meta mendore që e ka bërë një gjë të tillë. Nuk ka asgjë për t’u shqetësuar. Njerëz që duan të prishin harmoninë dhe qetësinë e muajit të bekuar, të shenjtë, e këtij muaji të madh e të begatë. Janë plagosur disa vëllezër nga stafi i xhamisë, por edhe disa besimtarë që kanë qenë duke adhuruar Zotin në ato momente”, theksoi ai.

Kryetari i bashkisë së Tiranës, Erion Veliaj ka dënuar me forcë sulmin me thikë ndaj qytetarëve në Rrugën e Kavajës.

Veliaj thekson se ky akt i rëndë nuk përfaqëson asnjë grimë nga fryma e paqes dhe e mirësisë që fal muaji i Shenjtë i Ramazanit, ndërsa u ka uruar shërim të shpejtë të plagosurve.

Ndërsa, Mons Angelo Massafra, Kryetari i Konferencës Ipeshkvore të Shqipërisë, ka reaguar në lidhje me ngjarjen e rëndë që ndodhi  në xhaminë “Dine Hoxha’”.

Në mesazhin e tij Massafra thekson se është i tronditur për ngjarjen dhe shpreh solidaritetin e të gjithë Kishës Katolike në Shqipëri.

Ai shpreson që kjo ngjarje të zbardhet sa më shpejt dhe ngjarje të tilla të mos përsëriten më.

-Përgatiti për TRT Shqip, Arben HALLUNI, Shqipëri-



Lajme të ngjashme