Tirana mirëpret për herë të parë Konferencën e Komitetit Ushtarak të NATO-s

Shefat e shtabeve të vendeve anëtare të NATO-s, përfshi edhe Shefin e Shtatmadhorisë së Turqisë, Gjenaralarmate Hulusi Akar kanë mbërritur në kryeqytetin shqiptar ku janë pritur nga Presidenti Ilir Meta dhe nga ministrja e Mbrojtjes, Olta Xhaçka.

Tirana mirëpret për herë të parë Konferencën e Komitetit Ushtarak të NATO-s

Shefat e shtabeve të vendeve anëtare të NATO-s kanë mbërritur në kryeqytetin shqiptar paraditen e të premtes dhe  janë pritur në takime të veçanta nga Presidenti Ilir Meta dhe nga ministrja e Mbrojtjes, Olta Xhaçka.

Me rastin e zhvillimit për herë të parë në Tiranë të Konferencës vjetore të Komitetit Ushtarak të NATOS, u mbajt mbrëmjen e sotme një takim gala në ambientet e Pallatit të Brigadave,  ku ishin të pranishëm Presidenti Ilir Meta, Ministrja e Mbrojtjes Olta Xhaçka dhe Shefat e Shtabeve të vendeve anëtare të Aleancës.

Në fjalën e tij, si i ftuar Nderi në takimin gala,Kreu i Shtetit, Ilir Meta, njëkohësisht Komandanti i Përgjithshëm i Forcave tona të Armatosura, deklaroi se Shqipëria mbështet zgjerimin e Aleancës drejt vendeve të rajonit si Kosova, Maqedonia dhe Bosnje Hercegovina.

Fillimisht Meta e vlerësoi në krye të herës mbajtjen e kësaj konference në vendin tonë, që sipas tij, “janë të dobishme për të shkëmbyer ide e përvoja, për të gjetur zgjidhje për sfidat e përbashkëta që vendet tona përballin, por pse jo, edhe për t’u njohur e afruar më shumë me njëri-tjetrin”.

“Për ata që e kanë vizituar më herët Shqipërinë, besoj është i lehtë konstatimi i një transformimi rrënjësor të vendit në të gjitha drejtimet. Me krenari ju pohoj se katalizator i këtij transformimi të gjithanshëm ka qenë orientimi i qartë dhe i paekuivok i Shqipërisë dhe shqiptarëve drejt Perëndimit, drejt vlerave më sublime të mishëruara në familjen e madhe euro-atlantike”, deklaroi Meta.

“Ne zgjodhëm me vetëdije dhe kthjelltësi të plotë politike dy objektiva strategjikë, projektet më madhore për vendin: Anëtarësimin në NATO dhe në Bashkimin Evropian. Përvoja jonë provoi se suksesi në këtë rrugëtim shumë sfidues arrihet përmes një qasjeje gjithëpërfshirëse. Nuk është rastësi që procesi i transformimit politik por edhe ai i Forcave të Armatosura të Shqipërisë që i pakontestueshëm, madje i gjithëpranuar, duke i shërbyer anëtarësimit dinjitoz të vendit në Aleancë. Do të punojmë që e njëjta frymë bashkëpunuese dhe përkushtimi të përshkojë edhe procesin tjetër jetik e strategjik për Shqipërinë, atë të anëtarësimit në Bashkimin Evropian. Shtrirja e kufirit të NATO-s brenda Ballkanit Perëndimor, me Shqipërinë e Kroacinë, dhe së fundmi me Malin e Zi, ka zgjeruar perimetrin e sigurisë jo vetëm për Aleancën, por edhe për rajonin e më gjerë. Shqipëria, edhe pse një vend modest, është eksportuese e sigurisë në rajon e gjetkë”, tha Meta.

Më tej Meta nënvizoi se “anëtarësia jonë në NATO ka rritur padyshim edhe përmasën tonë të përfaqësimit dhe ka krijuar një dimension të ri të sigurisë në raport me çështjet kombëtare, duke njohur garancinë më të madhe, më të fuqishme dhe më të mundshme. Përfitimet kanë qenë dhe janë të natyrës politike, ekonomike dhe ushtarake. Të ndërlidhura fort dhe me ndikim jo vetëm në sigurinë dhe mbrojtjen e vendit por edhe konsolidimin e një demokracie funksionale, tregut të lirë, forcimit të shtetit të së drejtës, konsolidimin e institucioneve demokratike dhe garantimin e të drejtave dhe lirive të njeriut”. 

Ai vuri në dukje sfidat me të cilat po përballet aleanca dhe secili prej vendeve tona si terrorizmi dhe krimi i organizuar, “Luftëtarët e Huaj” dhe emigracioni i paligjshëm.” Ndaj e gjej me vend të theksoj dy shtyllat bazë mbi të cilat ne kemi orientuar punën tonë në përgjigje të këtyre sfidave madhore: Së pari, bashkëpunimi i ndërsjelltë, të cilin e konsideroj shumë të rëndësishëm për t’u bërë pjesë e një zgjidhjeje të përbashkët, bazuar në solidaritet dhe kapacitet, në gatishmëri për të mbrojtur vlerat e parimet dhe respektit për ligjin ndërkombëtar.  Dhe së dyti, vazhdimi i reformave për vijimin e transformimit, modernizimit dhe rritjes së kapaciteteve së Forcave të Armatosura, përmbushja e detyrimeve dhe angazhimeve në kuadër të Aleancës, përfshirë përmirësimin e buxhetit të mbrojtjes në përputhje me angazhimet e mara në Samitin e Uellsit”, nëvizoi Kreu i Shtetit.

Më tej, Meta tha se Shqipëria i ka qëndruar besnike të gjitha angazhimeve dhe vendimeve të Aleancës, duke bashkërenduar qëndrimin e saj të qartë politik e duke iu bashkuar operacioneve të ndryshme ushtarake të aleancës apo koalicioneve ndërkombëtare në vende të ndryshme të globit”.

“Shqipëria është prezente në të gjitha misionet në NATO, por edhe në disa misione të BE-së, OKB-së dhe koalicioneve ndërkombëtare. Me këtë rast, dua të shpreh vlerësimin më të lartë për sakrificat dhe kontributet e të gjithë ushtarakëve shqiptarë që kanë shërbyer e vazhdojnë të shërbejnë ndër vite në misionet e Aleancës.  Një homazh të veçantë meritojnë sot të gjithë ushtarakët e 29 vendeve aleate që kanë rënë dëshmore në misionet e NATO-s, si dhe të shpreh konsideratën time më të lartë për sakrificat dhe kontributet e atyre në mbrojtje të lirisë, demokracisë dhe sigurisë sonë të përbashkët”, tha ai.

Presidenti deklaroi se “ne e kemi mbështetur dhe vazhdojmë të mbështesim politikën e ‘Dyerve të Hapura’ të NATO-s, përfshirë në rajonin e Ballkanit Perëndimor, duke e konsideruar një arritje të rëndësishme anëtarësimin e Malit të Zi dhe duke shpresuar që edhe vendet e tjera që dëshirojnë t’i bashkohen kësaj Aleance, Maqedonia, Kosova dhe Bosnje Hercegovina ta realizojnë sa më shpejt këtë ambicje me përmbushjen e kërkesave të anëtarësimit. Sa më shumë vende të Ballkanit Perëndimor të jenë pjesë e Aleancës, aq më e sigurt, e qëndrueshme dhe e begatë do të jetë e ardhmja jonë e përbashkët dhe interesat tona euroatlantike. Ne do të vazhdojmë të bëjmë çdo përpjekje për të qenë partnerë të denjë dhe të besueshëm të familjes sonë të përbashkët euro-atlanike”.

Në qendër të diskutimeve gjatë konferencës do të jetë angazhimi i vendeve në Luftën kundër Terrorizmit, Iniciativën për Ndërtimin dhe ngritjen e Kapaciteteve të Mbrojtjes në Irak.

Gjithashtu në diskutimet nga Tirana do të përcillen rekomandimet mbi misionet mbështetëseve në Afganistan dhe KFOR-in në Kosovë.

Në fund të takimit në Shqipëri, shefat e shtabit do të zgjedhin Kryetarin e ardhshëm të Komitetit Ushtarak të NATO-s, i cili do të marrë detyrën në vitin 2018.



Lajme të ngjashme