Serbia merr kryesinë e radhës të OSBE-së

Serbia merr sot nga Zvicra kryesinë e radhës të Organizatës për Siguri dhe Bashkëpunim në Evropë (OSBE).

Serbia merr kryesinë e radhës të OSBE-së

Zëvendëskryeministri serb, njëkohësisht ministër i Jashtëm i vendit, Ivica Daçiç deklaroi gjatë marrjes së kësaj kryesie se Ballkani Perëndimor, bashkëpunimi rajonal dhe procesi i paqes në Ukrainë do të ishin prioritetet e kryesimit të radhës të OSBE-së nga ana e Serbisë.

“Mendoj se rajoni është në rrugën e duhur dhe pres që kryesimi ynë të sigurojë nxitje shtesë për bashkëpunimin rajonal”, deklaroi Daçiç në ceremoninë e organizuar për përfundimin e kryesimit të OSBE-së nga Zvicra dhe marrjen e tij nga Serbia.

”Serbia, si vend kandidat për anëtarësimin në Bashkimin Evropian, është sinqerisht e vendosur të përmirësojë bashkëpunimin me fqinjët dhe vendet e rajonit”, theksoi ai.

Kryesimi i OSBE-së nga Serbia do të jetë i rëndësishëm për shkak të krizës në Ukrainë, që sipas Daçiç-it përbën një nga krizat më të rënda që nga mbarimi i Luftës së Ftohtë.

”OSBE-ja reagoi menjëherë ndaj kësaj krize, në rrethana jashtëzakonisht komplekse politike dhe dërgoi një mision vëzhgimi në Ukrainë, çka demonstroi efiçencën e organizatës dhe theksoi domethënien e saj globale”, deklaroi Daçiç.


Fjalët Kyçe:

Lajme të ngjashme