Dokumenti i Shqipërisë vlerësohet në konferencën e Berlinit

Kryeministri Edi Rama theksoi sot se dokumenti i paraqitur nga Shqipëria në Konferencën e Berlinit ka marrë vlerësme nga çdo palë.

Dokumenti i Shqipërisë vlerësohet në konferencën e Berlinit

“Nga çdo palë vlerësim për dokumentin e paraqitur nga Shqipëria! Konferenca startoi me ministrat e Ekonomisë së Gjermanisë+Austrisë+Rajonit”, shkruan Kryeministri Rama në një postim në rrjetin social Twitter.

Kryeministri Rama ndodhet në Berlin së bashku me Ministrin e Punëve të Jashtme, Ditmir Bushati dhe Ministrin e Zhvillimit Ekonomik, Tregtisë dhe Sipërmarrjes, Arben Ahmetaj.

Sipas axhendës zyrtare të shpërndarë nga qeveria gjermane, Konferenca e Berlinit për Ballkanin Perëndimor zhvillohet sot në Berlin, pas pjesëmarrjes së Kancelares Merkel para pak javësh në Takimin e Kryetarëve të Shteteve të Ballkanit Perëndimor në kuadër të procesit Brdo-Brijun, i cili u zhvillua më 15 korrik në Dubrovnik.

Kancelarja Federale Merkel së bashku me Ministrin Federal të Ekonomisë Gabriel dhe Ministrin e Jashtëm Federal, Steinmeier, do të presin Kryetarët e Qeverive, Ministrat e Jashtëm dhe Ministrat e Ekonomisë të gjashtë shteteve të Ballkanit Perëndimor si edhe të Kroacisë dhe Sllovenisë.

Qëllimi i kësaj nisme është trajtimi i çështjeve të hapura në rajon prej shumë vitesh dhe gjenerimi i impulseve të reja për përgjigjen e tyre. Këtu është fjala kryesisht për forcimin dhe mbështetjen e bashkëpunimit të shteteve të rajonit me njëra-tjetrën. Gjithashtu, bëhet fjalë edhe për afrimin me Evropën: afrimin politik, ekonomik, por edhe në pikëpamjen e shtetit të së drejtës. Gjermania është pro perspektivës evropiane për shtetet e Ballkanit Perëndimor.

Kancelarja Federale do të përshëndesë më 28 gusht, rreth orës 15:20 kryeministrat pjesëmarrës në këtë konferencë, respektivisht kryeministrin e Shqipërisë, Bosnje-Hercegovinës, Kosovës, Kroacisë, ish- Republikës Jugosllave të Maqedonisë, Malit të Zi, Serbisë dhe Sllovenisë. Në vijim do të zhvillohet një mbledhje pune.

Bashkimi Evropian do të përfaqësohet në mbledhjen e Kryetarëve të Qeverive nga Kryetari i Komisionit, Barroso. Më pas do të vijojë një mbledhje plenare në kuadrin e një darke pune nga ora 18:30 deri në 20:30, bëhet e ditur axhenda zyrtare e organizuar nga qeveria gjermane.


Fjalët Kyçe:

Lajme të ngjashme