ولسمشر اردوغان : تورکیه او ایران دوه سیمه ایز قدرتونه دي او زمونږ ترمنځه قوي اړیکې ځانګړی اهمیت لري

د تورکیې ولسمشر رجب طیب اردوغان د ایران له ولسمشر ابراهیم رئیسي سره د لیدنې په اړه ارزونې وکړې.

هغه وویل، "موږ د (ترهګریزو سازمانونو) PKK/PYD/YPG او PJAK، چې زموږ د هیوادونو او سیمې امنیت په نښه کوي، پر خلاف د مبارزې په برخه کې د همکارۍ د لا پیاوړتیا پر اهمیت ټینګار وکړ."

ولسمشر اردوغان  دا خبرې  د خپل ایراني سیال ابراهیم رئیسي سره  چې د رسمي سفر په خاطر پلازمینې انقرې ته راغلی وو د لیدنې نه وروسته  په ګډه خبري غونډه کې وکړې.

اردوغان وویل، «موږ له خپل ګاونډي ایران سره د متقابل اعتماد او ګډو ګټو پر بنسټ د خپلو اړیکو ژورولو ته اهمیت ورکوو.»

هغه وویل، "موږ د (ترهګریزو سازمانونو) PKK/PYD/YPG او PJAK، چې زموږ د هیوادونو او سیمې امنیت په نښه کوي، پر خلاف د مبارزې په برخه کې د همکارۍ د لا پیاوړتیا پر اهمیت ټینګار وکړ." اردوغان وویل "زه د جنورۍ په دریمه په کرمان کې ترسره شوی وحشیانه ترهګریز برید غندم. غواړم څرګنده کړم چې تورکیه د ترهګرۍ پر وړاندې په مبارزه کې د ایران ترڅنګ ولاړ دی."

ولسمشر اردوان  د اسرائیلو او فلسطین د شخړې په اړه هم خبرې وکړې چې د اکتوبر له اوومې راهیسې روانه ده.

هغه وويل: "موږ پر غزې د اسرائيلو د غير انساني بريدونو د پای ته رسولو او د عادلانه او تلپاتې سولې د ټينګښت لپاره د بيړنيو ګامونو د پورته کولو په اړه خبرې وکړې. موږ د هغو ګامونو د مخنيوي پر اهميت موافقه وکړه چې زموږ د سيمې امنيت او ثبات نور هم ګواښي."

اردوغان او رئیسي وروسته د تورکیې – ایران په سوداګریزه غونډه کې ګډون وکړ.

ولسمشر اردوغان په خپله وینا کې وویل "دوه سیمه ییز قدرتونه، تورکیه او ایران باید د پرمختګ او ثبات لپاره خپلې همکارۍ نورې هم زیاتې کړي. موږ هوډ لرو چې له ایران سره د سوداګرۍ  حجم ۳۰ میلیارده ډالرو هدف ته لوړ کړو. موږ له خپل ګاونډي ایران سره خپلې اقتصادي او سوداګریزې اړیکې د بندیزونو له امله تر ننه  پرې کړي ندي، او ددینه وروسته به يي هم پرې نکړو ".

هغه وويل " له ايران سره د نويو سرحدي دروازو پرانيستل زموږ د اجنډا په سر کې دي. زموږ د سرحدي ولايتونو د اقتصادي پراختيا په موخه د سرحدي سوداګريزو مرکزونو کار دوام لري."

په همدې حال کې د تورکیې او ایران د همکارۍ د عالي شورا له اتمې غونډې وروسته چې د دواړو هېوادونو د پلاویو په ګډون جوړه شوې وه، د دواړو خواوو تر منځ ۱۰ هوکړه لیکونه لاسلیک شول.