د صربستان ولسمشر : "موږ د سولې، ثبات او خپل هیواد لپاره جګړه کوو.

د صربستان  ولسمشر الکساندر ووچیچ د یکشنبې په ورځ په  صربستان کې جوړیدونکې غونډه کې  د کوسووايي  صربیانو  استازو ته د ګډون بلنه ورکړه.  

د صربستان ولسمشر ووچیچ پرون د بلجیم په پلازمینه بروکسل کې د اروپايي ټولنې  په  منځګړتوب او نوښت  د کوسوو له لومړي وزیر البین کورتي  سره  ولیدل. هغه د لیدنې نه  وروسته، د کوسووايي صربیانو استازو ته د راتلونکې  یکشنبې په ورځ په بلګراد کې جوړیدونکې غونډه کې  د ګډون  بلنه ورکړه.

 ووچیچ د البین کورتي سره د لیدو وروسته د خپل ټولنیز میډیا حساب له لارې د  ویډیو په خپرولو سره وویل  "موږ د سولې، ثبات او خپل هیواد لپاره جګړه کوو او زه صربستان  ته د بیرته ستنیدو لپاره بې صبرانه  انتظار باسم."

د  صربستان ولسمشر ووچیچ او د کوسووا لومړي وزیر  کورتي پرون په بروکسل کې د اروپايي ټولنې له خوا په لاره اچول شوې غونډه کې د دواړو خواوو ترمنځ د ستونزو د حل په برخه کې کوم پرمختګ ونه کړ.

کورتي او ووچیچ د اروپایی ټولنې د بهرنیو چارو او امنیت پالیسۍ لپاره د عالي استازې جوزپ بوریل په ګډون کې  سره ولیدل.

د ویلو ده چې د صربستان او کوسووا ترمنځه اړیکې وروسته له هغه ښې پسې ترینګلې شوې چې  کوسووا حکومت په هیواد کې میشتو صربیانو په ګډون ټولو وګړو ته د کوسووا  پيژند پاڼې او د موټرو لپاره د کوسووا د لمبر پلیټ د اخیستو پریکړه وکړه.

د کوسووا د حکومت ددې پریکړې نه وروسته پدې هیواد کې میشتو صربیانو پر مظاهرو لاس پورې او د هیواد شمالي پولې وتړلې. د کوسووا حکومت مجبور شو چې دا پریکړه وځنډوي.

د ویلو ده چې د اروپايي ټولنې د بهرنیو چارو او امنیت د پالیسۍ عالي استازي جوزیف بوریل له غونډې وروسته خبریالانو ته وویل، غونډې له شپږو ساعتونو څخه ډیر  دوام وکړ. هغه  وویل چې دوی د صربستان او کوسووا ترمنځ د اړیکو عادي کولو پروسې په اړه کومه نتیجه ترلاسه نکړه.  پداسې حال کې چې کوسووا په ۲۰۰۸ کال کې خپله خپلواکي اعلان کړې ده خو صربستان  کوسووا اوس هم  د خپلې خاورې په توګه ګڼي.

د ویلو ده چې تیره ورځ د ناټو سازمان مشر ستولتنبرګ هم دواړو هیوادونو ته خبرداری ورکړ چې بې ثباتۍ ته د لمن وهلو نه ډډه وکړي. هغه ګواښ وکړ چې د اړتیا په صورت کې به په سیمه کې د ناټو سوله ساتې ځواکونه مداخلي وکړي. د سیمې د سولې ، ثبات او امنیت په خاطر مذاخلې ته چمتو دی.