د ټایوان د مشرې لخوا د چین پر خلاف سخت غبرګون

د تایوان مشر سای اینګ وین د  چین  د هغه پوځي تطبیقاتو په اړه  چې ټایوان ته  د امریکا  متحده ایالتونو د استازو مجلس د مشرې نانسي پلوسي  د سفر په غبرګون کې پيل کړي دي ډیر سخت غبرګون وښود.

سای  خپلو خلکو ته په یوه ټلویزیوني وینا کې وویل چې د چین لخوا  د تایوان شاوخوا سیمو ته چې  نړیوال هوایي او سمندري دهلیزونه شتون لري د  توغنديو توغول "یو غیر مسؤلانه عمل دی او په سیمه کې پوځي ګواښونه زیات کړي دي ."

هغې وويل چې د چين کړنې  تايوان په تنګي کې وضعيت کمزوری کوي او زموږ له ملي حاکميت څخه سرغړونه کوي.

سای وویل چې تایوان به د چین د ګواښونو په مقابل کې تاوتریخوالی زیات نه کړي، مګر د خپل حاکمیت نه به  دفاع وکړي. هغې  پر بیجینګ  د اعتدال او سلیم عقل نه د کار اخیستو غږ وکړ ."

د ټایوان مشرې  دې په څرګندولو سره  وویل چې حکومت به په بندرونو او هوایی ډګرونو فعالیتونه پرته د هر ډول خنډ او ستونزې په نورمال  او عادي توګه د دوام پيدا کولو او مالي بازارونو د استحکام  لپاره به اړین ګامونه پورته کړي . د تایوان مشر یادونه وکړه چې د هیواد اردو هم د تطبیقاتو په سیمه کې  د څار کچه لوړه کړې.

تايوان مشرې ددې خبرې په ټينګار سره وویل چې هیواد به يي د سیمې د هیوادونو ، په نړۍ کې د ډیموکراتیکو شریکانو او  د هند او ارام سمندر سيمې د سولې د ساتلو لپاره سره ګډ کار کولو ته دوام ورکړي.

 موږ پر نړيوالې ټولنې غږ کوو چې د تايوان د ډيموکراسۍ ملاتړ وکړي او د چين له يو اړخيز او غير منطقي پوځي اقداماتو او چلند سره مخالفت وکړي.

د تایوان مشرې د G7 هیوادونو څخه په ګډه اعلامیه کې د چین په کړنو د نیوکې کولو  او د تایوان په تنګي کې د سولې او ثبات لپاره د دوی ملاتړ مننه وکړه."

د تایوان د دفاع وزارت خبر ورکړی چې د چین له خوا د دغه ټاپو په شاوخوا کې د پوځي تمرینونو په ترڅ کې توغول شوي توغندي د ټایوان په سمندري حریم کې لګیدلي دي. د چین د دفاع وزارت د پلوسي له سفر وروسته اعلان وکړ چې دوې  به د ټاپو په شاوخوا کې "یو لړ پوځي تمرینونه" ترسره کړي.