پمپیو: ولسمشر ټرمپ پرته د قید او شرط نه روحاني سره لیدنې ته چمتو دی

پمپیو   او د  خزانې وزیر سټیون منوچین د ولسمشر ټرمپ لخوا  لاسلیک شوي د ترهګرۍ پر وړانډې د مبارزې په خاطر  د بندیزونو د لا پراخولو اړوند  د تقنیني  فرمان  په اړه  په سپینه ماڼۍ کې جوړه شوي په خبري غونډه کې ګډون وکړ.

پمپیو د یو خبریال د  پوښتنې په ځواب کې چې ایا  د ایران ولسمشر روحاني به  د روانې میاشتې  په وروستیو کې په نیویارک کې جوړیدونکي  د ملګروملتونو د عمومي اسمبلې  په چوکاټ کې  د ولسمشر ټرمپ سره  مخامخ لیدنه وکړي او که نه؟ داسې وویل، ولسمشر ټرمپ  د ایران د ولسمشر روحاني سره  پرته د قید او شرط نه لیدنې ته  حاضر دی.

همداشان  د امریکا د خزانې وزیر سټیون منوچین   بیا  د ټرمپ او روحاني د احتمالي لیدنې په اړه د پوښتنې په ځواب کې وویل « امریکا  پر ایران  د هر چا نه ډیر زیات  بندیزونه  لګولي دي  او دې مسئلې ډیره زیاته ګټه هم کړې ده . ولسمشر ټرمپ ویلي دي چې  پرته د قید او شرط نه د روحاني سره  لیدنې ته چمتو دی خو ددې سره  سره  د ایران پر خلاف تر وروستۍ درجې فشارونو ته به هم  دوام ورکړو. »

د ویلو ده چې د امریکا  ولسمشر ډونلډ ټرمپ تیره اوونۍ ویلي وو چې  د ملګروملتونو د عمومي اسمبلې په چوکاټ کې  د ایران ولسمشر روحاني سره  لیدنې ته چمتو  دی.

ټرمپ ویلي وو « نه پوهیږم  خو هر څه ممکن دي. ایران چې  د اقتصادي او مالي پلوه د ډیرو جدي ستونزو سره مخامخ  کړی  که چیرې  وغواړي چې خپله دا ستونزه  حل کړي  مونږ  په ۲۴ ساعتونو کې  ورته  ټولې ستونزې حلولی شو.»