د اتریش حکومت سقوط وکړ
د اتریش ولسي جرګې د نوموړي هیواد د حکومت نه د باور رایه واخیسته.
د ولسي جرګې لخوا د لومړي وزیر سباستین کورز په مشرۍ د حکومت نه د باور د رایې د اخیستو سره حکومت سقوط وکړ.
د اتریش په ولسي جرګه کې د حکومت مخالفینو د حکومت په اړه د باور د رایې د تازه کولو غوښتنه وکړه. د حکومت مخالفینو دا غوښتنه هله وکړه چې تیره اونۍ په رسنیو کې د روسانو سره د حکومت د شریک ګوند د مشر د پټو مذاکراتو ویدیو خپره شوه. ددې سره په ولسي جرګه کې رای اچونه وشوه او مخالفینو د حکومت پر خلاف رای وکاروله.
د اتریش خلکو د ګوند مشر او لومړي وزیر سباستین د ولسي جرګې لخوا د حکومت نه د باور د رای د اخیستو په اړه سخت غبرګون وښود او وویل چې وروستۍ پریکړه باید د اتریش خلک وکړي.
کورز وویل چې د حکومت شریک د اتریش د ازادۍ ګوند پخواني عمومي مشر او د لومړي وزیر مرستیال هینز کرستین د روسیې سره د پټو مذاکراتو خپرې شوې ویدیو هم زمونږ ائتلاف او هم حکومت ته ډیر ستر زیان ورسو.
د بله پلوه د اتریش ولسمشر الکساندر وان در بیلین د نوي حکومت تر ټاکلو پورې د هیواد د مالیې وزیر د سرپرست لومړي وزیر په توګه په دنده وګماره. ولسمشر وویل چې د کابینې وزیران به د نوي حکومت تر ټاکل کیدو پورې خپلې دندې ته دوام ورکړي.
د ویلو ده چې په اتریش کې د دویمې نړۍوالې جګړې نه وروسته دا لومړی ځل دی چې ولسي جرګه د یو لومړي وزیر نه د اعتماد رای په اخیستو سره هغه له دندې ګوښه کوي.
د اتریش ائتلافي حکومت هله په لرړیدو شو چې تیره اوونۍ د حکومت د شریک د اتریش د ازادۍ ګوند د پخواني مشر او د لومړي وزیر مرستیال هینز کرستین هغه ویدیو چې په ۲۰۱۷ کال کې د اسپانیا د ابیزا په ټاپو کې د روسي پانګه والو سره پټ مذاکراتو کړي وو خپره شوه. هغه پدې مذاکراتو کې روسي پانګه والو نه غوښتنه کړې وه چې په ټاکنو کې ددوې د ګوند سره د مالي مرستې کولو په بدل کې به بعضې قراردادونه روسي شرکتونو ته ورکړي. دا ویدیو د رسنیو لاس ته د غورځیدو نه وروسته د اتریش د ازادۍ ګوند مشر استعفا کولو ته اړ شو.
دې مسئلې د حکومت ستنې هم ولړزولې چې بالاخره يي سقوط وکړ.
اړوند خبرونه
د روسي کښتۍ لخوا د المان پر پوځي چورلکې د برید ادعا شوې ده
د بالتیک په سمندر کې د روسي کښتۍ لخوا د آلمان پر پوځي چورلکې د خبرداري برید کولو ادعاء شوې ده.
