د امریکا د بهرنیو چارو وزیر شمالي کوریا ته سفر وکړ

د امریکا  د بهرنیو چارو نوی وزیر مایک پومپیو  د ناڅاپي  سفر په ترڅ کې  شمالي کوریا ته لاړ.

پومپیو ویلي دي چې  په شمالي کوریا کې  د زنداني ۳ تنو امریکايي وګړو  د ازادولو  د مسلې په اړه به د شمالي کوریا د چارواکیو سره خبرې وکړي.

هغه شمالي کوریا ته د سفر پر مهال  په الوتکه کې د خبریالانو پوښتنې ځواب کړې.

هغه وویل چې  په شمالي کوریا کې به د جګپوړو مقاماتو سره  وویني.

هغه زیاته کړه چې د شمالی کوریا د چارواکیو سره  به نن یو ځل بیا  په نوموړي هیواد کې د زنداني  ۳ تنو امریکايي وګړو د خوشې کولو  په مسلې  وغږیږي.

پومپیو وویل « که چیرې  زنداني  امریکایان  خوشې  شي  دا به  د شمالي کوریا لخوا د امریکا پر وړاندې  یو ډیر فوق العاده  نیک  ګام  وي. »

هغه  ددې پوښتنې په ځواب کې  که چیرې شمالي کوریا  زنداني امریکايي وګړي خوشې نکړي  تاسې به  د جګپوړو چارواکیو سره  لیدونو ته دوام  ورکړۍ او که نه؟ داسې وویل، هیله لرم  چې داسې کوم کار ونشي.

د ویلو ده  چې  نوموړي  تیره میاشت هم  د یو پټ  سفر په ترڅ کې  شمالي کوریا ته تللی وو او د کیم جونګ اون سره يي لیدنه کړې وه.

پومپیو  دا ځل د  بهرنیو چارو وزیر په توګه  شمالي کوریا ته  ښکاره  سفر کوي.

همداشان ټاکل شوې ده چې د امریکا متحده ایالتونو ولسمشر دونالد ټرمپ  د څو اونیو په دننه کې د شمالي کوریا د ولسمشر کیم جونګ اون سره  مخامخ لیدنه وکړي.