په روسیه کې په سوداګریز مرکز کې اورلګیدنې قتل عام رامنځته کړ

د روسیې  د سایبریا سیمې   د کمروف  په ښار کې  په  یو  لوی تجارتي مرکز کې  د اورلګیدنې له امله  په لسګونو تنو ژوند  د لاسه ورکړ.

روسي مقاماتو  ویلي دي چې  پدې پيښه کې د مړو شمیره  ۶۴ تنو لوړه شوې ده .

په پيښه کې  د لسګونو تنو د ټپي کیدو او  لا درکه  کیدو نه خبر ورکړ  شوی دی.

د ترلاسه شوي رپوټ له مخې  پیښه  تیره شپه رامنځته شوه.

د سایبریا د کمروف  په ښار کې  د زیمنایا ویشنیا  د سوداګریز مرکز  په اخري منزل  کې  د سینماګانو او ماشومانو  د لوبو  د سامانونو په پوړ کې  اورلګیدنه رامنځته شوې ده.

ویل کیږي د پيښې قربانیان هم  ډیری  ماشومان  دي. د کمروف ښار  د اور وژنې  ادارې ویلي دي چې  پدې پیښه کې تر اوسه پورې ۶۴ تنو ژوند د لاسه ورکړی دی او نږدې ۴۰ تنه نور ټپیان شوي دي.

یادې شوې اداري ویلي دي چي  ۱۶ تنه  لا درکه دي. لا درکه  شوي کسان هم  ټول ماشومان  دي.

د بله پلوه  د روسیې  د بیړنیو حالاتو وزارت ویلي دي چې  پدې پيښه کې  تر اوسه پورې  ۶۴ تنو ژوند  د لاسه ورکړی دی چې ګن شمیر يي  ماشومان  دي. ۱۶ تنه لا درکه شوي دي چې د موندولو  او ژوندي ژغورلو چانس يی  د هرې شیبې په تیریدو سره  مخ په کمیدو  دی.

عینې شاهدانو ویلي دي چې  اورلګیدنه  د ماشومانو  د لوبو په سیمه کې  د برښنا د شارټۍ  له کبله رامنځته شوې ده .

عینې شاهدانو ویلي دي چې د اورلګیدنې د رامنځته کیدو نه وروسته  سمدلاسه د خلکو نه وار خطا شول. همداشان عیني شاهدانو ویلي دي چې د ارولګیدنې  د رامنځته کیدو نه وروسته  د تجاري مرکز  مسئولانو  د خطر کوم  زنګ  او یا خلکو ته خبرداری  ورنکړ  هړ سړي  په خپله وسله  د یاد شوي مرکز نه د وتو هڅه کوله. حتا ځینو  کسانو  ځانونه  د کړکیو له لارې  بهر ته ګوزار کړل.

پيښه  د یکشنبې  د رخصتۍ  په ورځ  هله رامنځته شوه چې په سلګونو تنه  د ماشومانو سره  یاد شوي مرکز ته  تللي وو.

د اور وژنې چارې  تر ډیره  حده  سرته  رسیدلي دي. د لا درکه شوو کسانو د موندولو په خاطر  هلې ځلې دوام لري.