امریکا دوه تنه روسي چارواکي د هیواد نه وشړل

د امریکا متحده ایالتونو د بهرنیو چارو وزارت په مسکو کې  د روسيې د پولیس لخوا ددوی د یو تن ډیپلوماټ د ډبولو په غبرګون کې  د دوو تنو روسي چارواکیو د ډیپورتولو نه خبر ورکړ.

د امریکا د بهرنیو چارو وزارت ویاند جان کیبري خبري ناستې ته وویل چې«  د روسیې په پلازمینه  مسکو کې  یو تن روس پولیس  د امریکا  د سفارت په مخکې  زمونږ په ډیپلوماټ برید کړی وو چې ددې په غبرګون کې مونږ  هم  د روسیې دوه تنه چارواکي د هیواد نه  ډیپورت  کړل.»

هغه وویل چې  روسي چارواکي  د جون په ۱۷ نیټه د امریکا نه ډیپورت شوي دي.

کیبري  د ډیپورت شوو روسي چارواکیو په اړه د معلوماتو ورکولو نه ډډه وکړه.

هغه زیاته کړه چې  دا څرګندونې د روسيې لخوا د غلطو  معلوماتو د خپرولو نه وروسته  کوو. د جون په ۶ مه نیټه  امریکايي ډیپلوماټ  په مسکو کې  غوښتل چې سفارت ته داخل شي  چې د روس  پولیس لخوا پر برید وشو. هغه وویل چې امریکايي ډیپلوماټ  روس پولیس ته ویلي  وو چې  ډیپلوماټ دی  او د سفارت لخوا ټاکل شوي ټول شرایط يي هم  پر ځای کړي وو خو ددې سره سره  پرې روس پولیس برید کړی وو.

هغه وویل روس پولیس  وايي چې  د امریکا د سفارت د امنیت په خاطر په نوموړي امریکايي برید کړی دی چې  خبره حقیقت  نلري.

کیبري وویل چې د نوموړې پیښې نه وروسته د روسیې امنیتي چارواکیو په امریکايي کارکوونکو  فشارونه لا زیات کړي دي چې پدې اړه يي د روسيې حکومت ته خبرداری هم ورکړی دی .

د بله پلوه  د روسیې د بهرنیو چارو وزارت بیا ادعا کوي    چې امریکايي ډیپلوماټ په اصل کې د نوموړي هیواد  استخباراتو  کارکوونکی  دی  او د پولیس لخوا ترینه  د کارټ یا پیژند پاڼې  د پوښتنې پر مهال  لومړی په پولیس  د سوک ګوزار کړی دی .