په فرانسه کې مظاهرو او اعتصابونو د ژوند په چارو بدې اغیزې کړي دي

فرانسه  د مظاهرو او اعتصابونو  تر سیورې  لاندې  د اروپا د فوټبال  اتلولیو ایرو ۲۰۱۶ سیالیو ته تیاری نیسي. د ایرو ۲۰۱۶ د فوټبال  د اتلولیو سیالۍ  سبا  د جون  لسمه  د جمعې په ورځ  پیلیږي.

د فرانسې په پلازمینه پاریس کې د کثافاتو د لمنځه وړو  او راټولو د کارګرانو  د اعتصاب  له امله  په هره سیمه کې  د کثافاتو  ډیري  راټول شوي دي.

په پاریس کې  هره ورځ  ۲۰۰ د کثافاتو ځانګړې موټرې  ۲ زره ټنه  کثافات راټولوي  او د لمنځه وړو په مرکز کې  په انرژۍ  بدلیږي.

همداشان د فرانسې  د ریل ګاډو ډیری کارکوونکو هم  په اعتصاب کې برخه اخیستې چې د همدې امله  ټرانسپورت د ستونزو سره مخامخ  دی.

په پاریس کې  د ریل ګاډو د ادارې د کارکوونکو  د اعتصاب له امله  تر اوسه پورې  یادې شوې ادارې ته  ۳۰۰ میلیونه ایرو  زیان  اوښتی دی.

د فرانسې په څلورو خواوو کې  کارګرانو د حکومت پر خلاف په مظاهرو ، لاریونونو او اعتصاب  لاس پورې کړی دی .

قهرجنو مظاهره کوونکو  پاریس ته  د هغه ریل  چې  د ایرو ۲۰۱۶ د فوټبال د اتلولیو کپ  پکې  وړل کیده د سفر  مخه ونیوله. پولیسو په مظاهره کوونکو  سخته مداخله وکړه چې په پای کې  کپ  د شدیدو امنیتي تدابیرو  لاندې پولیسو ته  تسلیم کړی شو.

همداشان د فرانسې  پولیس  بیا  د مظاهره کوونکو  پر وړانډې  د شدت او سخت چلند له امله  د نیوکو لاندې قرار لري.

د فرانسې  د ملکي هوايي چلند شرکت  ایر فرانس  پیلوټانو ویلي دي چې  د جون د ۱۱مې او ۱۴مو نیټو ترمنځه به په اعتصاب کې ګډون وکړي.

د فرانسې  د ټرانسپورت وزیر  د پیلوټانو ددې پریکړې نه د هیواد لپاره پدې حساس وخت کې  د بې مسولیتې په توګه یادونه وکړه .

د بله پلوه  په فرانسه کې  د ایرو ۲۰۱۶ د فوټبال  د اتلولیو  د سیالیو پر مهال  د احتمالي  ترهګریزو بریدونو اندیښنې هم  شتون لري.

د فوټبال  د لوبغالو  په شاوخوا سیمو کې  پولیسو کلک امنیتي تدابیر نیولي دي. خلک د کلکۍ پلټنې او تالاشۍ نه وروسته  سیمې ته د تیریدو اجازه ترلاسه کوي. حکومت هم  د امنیتي تدابیر په برخه کې  هر ډول  ګامونو پورته کولو نه ډډه نکوي.

د ایرو ۲۰۱۶ د اتلولیو سیالۍ  د جون په لسمه نیټه پیلیږي  او د جولای  تر لسمې نیټې دوام کوي. دا سیالۍ  د فرانسې په لسو ښارونو کې جوړیږی. د ایرو ۲۰۱۶ اتلولیو په چوکاټ کې به ټولټال  ۵۱ سیالۍ  ترسره شي.

تمه کیږي چې  نږدې  ۸ میلیونه  د فوټبال مینه وال  د ایرو ۲۰۱۶ د اتلولیو د سیالیو د نندارې په خاطر  فرانسې ته لاړ شي.