په تکساس کې د محمد ص د کاریکاتورونو د سیالئ په سالون برید وشو

د امریکا  د تکساس  ایالت د دالس  په ښار کې  د اسلام  د ستر پيغمبر حضرت محمد صلی الله علیه وسلم  د کاریکاتورونو  د سیالئ‌  په سالون  ډزې  وشوې. 

د تکساس ایالت  د دالس  د ښار د ګارلنډ  د سیمې  پولیسو  د برید نه وروسته  خبري‌ رسنیو ته وویل  دوو تنو  چې  د اسلام د پیغمبر محمد ص د کاریکاتورونو  د سیالئ  په سالون  ډزې  وکړې  د پولیسو  لخوا  ووژل شول. پولیسو  ویلو  دي‌ چې  پدې  ډزو کې  یو تن پولیس  هم  ټپي‌ شوی دی . 

دا مراسم  د اسلام د مخالفینو  د امریکا  د ازادئ نه  د دفاع د سازمان  لخوا  جوړ شوي‌ وو. پولیسو  ویلي‌ دي  چې  دوو تنو برید کوونکو  د موټر نه  د سالون په امنیتي  کسانو  ډزې  وکړې چې  د پولیسو په ځوابي‌ ډزو کې  برید کوونکي‌ ووژل شول.

پولیسو  د برید کوونکو د هویت  او دا چې  دا  برید ددې سیالئ  سره  کوم تړاو لري‌ او که نه  څه ندي‌ ویلي. 

ویل کیږي‌ د نوموړو مراسمو جوړونکو  د اسلام مخالفینو د امریکا د ازادئ‌ نه د دفاع  سازمان  ددینه وړاندې  هم  په کراتو دیته  ورته د اسلام پر خلاف  مراسم  او سیالئ‌ جوړې  کړي‌ دي. 

پدی  سیالئ‌ کې  چې  لس زره امریکايي ډالره  جایزه يي هم  درلوده  د اسلام  ستر مخالف  د هالنډ د هیواد  ګرټ  ویلډز هم ګډون کړی وو. د برید نه وروسته  سالون سمدلاسه تخلیه کړی شو.

د ویلو ده چې  د امریکا  د ازادئ‌ د دفاع  سازمان ددینه وړاندې  په نیویارک کې  د سوداګریز مرکز  تر څنګ د اسلامي‌ مرکز  د جوړیدو پر خلاف هم  کمپاین  جوړ کړی وو. یاد شوي‌ سازمان  د اسلام پر خلاف  د خپرونو په خاطر  په ټوله امریکا کې  اعلانونه  خپاره کړي‌ وو. 

ویل کیږي‌ دا سیالئ‌ ( محمد رسم  کړه  )  تر نامه  لاندې  جوړه شوې  وه.