اسلامي همکاریو سازمان او عرب لیګ د غزې لپاره فوق العاده غونډه وکړه

د اسلامي همکاریو سازمان  او د عرب لیګ فوق العاده ګډې سرمشریزې په پریکړه لیک  کې، د ملګرو ملتونو امنیت شورا  څخه په غزه کې د اوربند د ټینګېدو لپاره د يوي غوڅې او قاطع پرېکړې غوښتنه وکړه.

د سعودي عربستان په پلازمینه ریاض کې د اسلامي همکاریو سازمان  او د عرب لیګ فوق العاده ګډې سرمشریزې نه  وروسته چې د عربي او اسلامي هیوادونو مشرانو په کې ګډون کړی وو، یوه ګډه اعلامیه خپره شوه.

په اعلامیه کې د اسرائیلو له خوا د نړیوالو قوانینو سرغړونو ته اشاره شوې، ویل شوي چې ملګري ملتونه په څرګندو اقداماتو کې پاتې راغلي او نړیواله ټولنه ناکامه شوې ده.

په اعلامیه کې د امنیت شورا څخه غوښتنه شوې چې په غزه کې د اوربند ټینګولو او د بشري مرستو د ننوتلو لپاره یوه غوڅه او قاطع پرېکړه وکړي. همدارنګه پکې ویل شوي چې د اسرائیلو د ملګرو ملتونو عمومي غونډې کې د ګډون ځنډولو لپاره به نړیوال ملاتړ راټول شي، او په دې چوکاټ کې به عمومي غونډې ته د پرېکړې یو مسوده وړاندې شي.

په ګډه اعلامیه کې د اسرائیلو له خوا د ترسره شوو جرمونو لپاره د يوې خپلواکې نړیوالې څېړنې غوښتنه وشوه.

په اعلامیه کې ټولو هېوادونو څخه غوښتنه شوې چې "اسرائیلو ته د وسلو او مهماتو صادرات یا لېږد بند کړي" او د اسرائیلو د سرغړونو د مخنیوي لپاره دې نړیوال بندیزونه ولګول شي.

په اعلامیه کې د نړیوال عدالت د محکمې پرېکړې هم یادې شوې او غوښتنه وشوه چې دغه پرېکړې دې ژر تر ژره پلي شي.