د هند – اسراييلو د اړيكو په ډګر كې نوى پيل

ويل كيږي چې نتانياهو هڅه كوي چې ددې ليدنې پرمهال پر هندوستان باندې د ۵۰۰ ميليونو ډالرو په ارزښت توغندي وپلوري.

د هارتز ورځپاڼه چې په اسراييلو كې خپريږي پدې اړه ليكلي دي چې د دواړو هېوادونو ترمېنځ د توغنديو د خرڅلاو په اړه پخوا تړون لاسليك شوى و خو هندوستان دا تړون په يو اړخيز ډول لغوه كړى و.

نتانياهو د هند – اسراييلو ترمېنځ د اړيكو د پيل د ۲۵مې كليزې د لمانځلو په موخه نوموړي هېواد ته سفر كړى دى. نتانياهو هڅه كوي چې د توغنديو د خرڅلاو تړون بېرته را ژوندى كړي.

پدې لړ كې د اسراييلو د ملي امنيت مشاور مېر بن شابات د خپل هندي سيال آجيټ كمار ډووال سره هم ليدنه وكړه.

هندي چارواكو پخوا اندېښنه ښودلې وه چې دا تړون به په هېواد كې دننه د توغنديو د توليد بهير ته زيان ورسوي.

هندي مقاماتو ددې تړون د عاقبت په اړه څه نه دي ويلي.